聞西──魚露白肉 冷暖滋味在心頭

 2021-04-08
聞西──魚露白肉 冷暖滋味在心頭

宴客菜唔係一定要「貴、貴、貴」嘅,有時候只要花啲心機攞盤,整整齊齊就已經加晒分。好似我咁有時約朋友喺屋企打邊爐,我都會將啲丸呀、菜呀、菇呀,砌到好似幅畫咁,一個大盤放晒所有配料,賣相已經加晒分,重點仲要係朋友會欣賞你嘅心思,而實情係冇乜難度!就好似出街食蒜泥白肉,我最怕嗰啲求求其其放埋一碟,明明可以做得精緻啲,又明明花咗咁多心機去煮,點解連最後一步上碟都要懶呢?

今次分享嘅魚露白肉食譜,就最啱同我一樣嘅姿整怪。做法同蒜泥白肉差唔多,不過就加咗魚露調味,唔落蒜蓉都可以辟咗豬肉嘅肉騷味。白肉要爽脆全靠一冷一熱,煲完之後再浸冰水,重複兩次咁就搞掂。當然,屋企未必有冰,咁就可以好似我儲起買雪糕或者凍肉送嘅冰袋,預先放落水浸一陣就有冰水用㗎喇,個冰袋仲可以重複使用添!今次要用泰國魚露,貪佢夠鹹更易入味,越南魚露比較淡就冇咁適合喇。另外記得以前喺台灣食過白肉配醬油膏、薑絲都好好味,大家都可以試吓。