聞西──翡翠白玉環 豆胚釀個好彩頭

 2021-02-11
聞西──翡翠白玉環 豆胚釀個好彩頭

唔覺唔覺又到農曆新年,真係唔多覺係新年。舊時,去到年廿幾應該非常之忙,買揮春、買過年食品、買海味、大掃除、行花市……今年呢?我乜都冇做過,就好似平日一樣咁,日日睇住啲封區新聞點會有心情呢!六點禁堂食對市面影響好大,條街夜晚靜英英,團年飯晚市消失咗,食店都變陣狂推盆菜,一鑊熟係方便嘅,但我比較傳統,團年飯要有好多餸放到成枱都係先至開心。話時話,我已經好多年係一個人食團年飯,呢啲感覺只可以係回憶中回味吓。

過年菜式未必一定要用上名貴材料,但一定要改個好聽嘅名,今次分享嘅食譜叫:翡翠白玉環。做法類似櫛瓜瑤柱脯,將豆胚釀入像白玉環嘅白蘿蔔,再用蘿蔔汁及浸瑤柱水埋個芡,然後淋上面。想好睇啲,就可以加啲醬油漬三文魚子,清清哋唔怕食膩,賣相又靚!揀個靚蘿蔔方法十分簡單,蘿蔔有輕微爆開即係有好多汁,咁就唔太適合做今次嘅餸。用嚟做玉環,就要揀直身嘅,唔使太大條,要揀重身、結實飽滿、表皮光滑、葉要夠青綠挺身同埋冇鬚根嘅。我好支持本地農業,今次用嘅白蘿蔔係產自本地有機農場。




材料:
白蘿蔔 1條
豆胚 4両
蒜蓉 1湯匙
瑤柱 2至3粒
蝦乾 3至4隻
醬油漬三文魚子適量
(或用杞子裝飾代替)



做法:
1. 瑤柱、蝦乾預先浸軟,保留浸瑤柱嘅水,瑤柱用手捽成絲、蝦乾切粒備用。



2. 白蘿蔔去皮,切成約4cm厚圓塊,用小刀圍繞內圓心切一圈。清除中間部份做成環狀,可用刀修飾玉環內側,之後隔水蒸20分鐘,將玉環放上碟,另保留蘿蔔汁。