聞西──海味南乳紹菜煲 唔係齋講好味道

趁仲係新正頭，首先祝大家身體健康、身體健康、同埋身體健康！疫情下祝身體健康當然唔會嫌多，因為你唔健康分分鐘會累街坊。過年少不免會同親友多啲團聚，要安心拜年又唔使靠政府嘅，其實只要聚會之前各自做好病毒測試，就可以大大減低交叉感染嘅機會。

今年因為有聚會，大年初二已經要去街市買餸，如果換轉以前真係唔使諗！記得我細個嗰陣，新年街市真係會休息幾日，連超級市場都會休息，阿嫲通常買定幾棵長紹菜掛喺窗邊，就係驚新年無菜（冇財），而且長紹菜非常襟擺，用嚟壓年就最適合不過！話說好多人都會按傳統大年初一食齋，一味用長紹菜做嘅南乳齋煲更係必備菜式。

各處鄉村各處例，今年大年初一去到契爺屋企食飯，梗係要幫手煮餸。原來佢哋嘅齋煲係有落吊片同蝦米，契姐話契爺好鍾意呢份鹹香味，所以齋心唔齋口囉（一笑）。我阿嫲煮南乳齋煲都有一手，今日就同大家分享分享，想好食有幾個貼士要記住，第一，要先慢火爆香薑片，第二，要灒紹酒，第三，要落胡椒粉，第四，南乳要用油爆香。其實，紹菜都係有啲草青味，所以頭三個貼士都係辟走草青味為主，加咗吊片同蝦米真係好食好多。

做法 :
1. 如圖所示，預備好各樣材料。

2. 慢火燒熱鑊，落油煎香薑片，要煎到聞到好重薑味先得。之後，落蝦米及吊片絲爆香，跟住落南乳爆香，再灒紹酒。

3. 再落冬菇及雲耳炒勻，加入其餘調味料炒香，然後落埋紹菜炒勻。

4. 加入300ml浸菇水或者清水，面頭放上炸枝竹及豆卜，冚蓋炆至材料軟身。試味，落粉絲慢慢炒至收汁，最後落麻油炒勻就得。