聞西──黑糖烤麩 新年齋煮愛的筋源

虎年第一次同大家見面，當然要拜個年，祝各位《我家》讀者虎中有樂、「虎進」金來、龍精虎猛！希望呢隻老虎仔可以鎮得住個疫情啦，成個農曆新年就係食食食，感受到個肚腩「快高長大」，搞到都唔夠膽再上磅。除咗每朝都食年糕早餐外，相信食得最多嘅都係盆菜，其實食盆菜最大原因都係一個字：懶！如果收到一個盆，仲要自己逐樣材料解凍還原切返落個盆，都好難唔同佢開年喎！

有酒店之前趁新年推出賀年盆菜價值$1,688，酒店出品理應唔差，點知送到嚟個盆菜係散㗎！蔬菜、魚蛋、龍蝦、豬腩、鮑魚、鵝掌等食材，竟然全部都係獨立急凍真空包裝，要客人自己解凍翻熱擺盆，就好似自己買咗一堆凍肉返屋企咁，今次真係因減得加喇！不過酒店回覆話，宣傳單張已經寫咗係急凍真空包裝，唔通即係話：「個客人蠢咋，唔關我事咁話」？

食得咁勞氣，出年都係自己煮。每年初一例牌都會煮齋食，今年我就煮咗個黑糖烤麩（音：夫）。烤麩係麵筋嘅一種，將麵團放喺水入面搓洗去除澱粉，反覆搓洗之後就會得出麵筋，再經發酵蒸熟製成呈海綿狀嘅烤麩。烤麩鬆軟有彈性好有咬口，而且吸汁力強，佢亦都好似真肉咁含有大量蛋白質，係一款天然嘅素肉。煮烤麩有個秘訣，就係一定要用手將佢撕成件，加埋黑糖嘅香甜味，真正天然有營食得健康！

材料：
烤麩200g、薑幾片、旺菜、甘筍、冬菇、雲耳、髮菜適量

調味料：
黑糖、蠔油、豉油、麻油各1湯匙、胡椒粉1/2茶匙

做法：
1. 將幾塊旺菜葉灼軟過冷河，之後鋪滿一個大碗備用。

2. 烤麩用手撕成件，其他材料洗切好。

3. 先將烤麩及薑片煎香，然後加入其他材料炒至軟身。再落調味去炒勻，加少少水冚蓋煮10分鐘。

4. 全部材料倒入碗裡面，再隔水蒸半個鐘，準備大碟放在碗上面，小心將碟反過嚟就可以上碟。

小貼士：
煮齋菜其實冇乜特別固定材料，自由決定就可以。至於調味料份量，就跟材料份量自我調整啦，因為過年先整色整水，平時食就可以慳番做法步驟1及4，不過就要煮耐少少等材料入味啲。