聞西──外脆內軟鮮菇炒麵 素味謀麵的驚喜

時間流逝好多味道都會流失，最近同朋友傾開，佢話宜家啲肉絲炒麵同細個食嗰陣好唔同，我答佢點止肉絲炒麵呀，宜家食條菜都唔同晒味啦！真係早出世早享受，以前雖然係窮但係菜有菜味，雞有雞味，真係冇比較就冇傷害呀！

講番肉絲炒麵，以前跟阿爺去飲茶佢成日都會叫，但我就麻麻哋啱食，因為細個唔鍾意食韭黃，所以我淨係會集中食邊邊啲脆麵，哈哈！

宜家外面整嘅肉絲炒麵唔會好似舊時咁慢慢同你煎脆，放落油鑊快速炸一炸淋個芡料就算㗎喇，唔可以話咁整唔好食嘅，又要平又要快就唔可以咁多要求。

以前嘅廣東式炒麵就好似整兩面黃咁，將啲煮開咗嘅麵做成餅形，然後慢慢煎到兩面脆身，之後先淋上芡料，大約冚住麵餅嘅三分之二，要做到麵條有乾有濕，外邊脆中間又帶軟，同炸完再索汁嗰啲軟淋淋麵係唔同口感㗎！

蛋麵較淺色 唔好買錯

至於肉絲炒麵究竟用邊種麵呢？去街市麵檔買蛋麵就冇錯㗎喇，蛋麵成分主要係雞蛋、麵粉同梘水，所以外表淺黃。至於整豉油皇炒麵嘅麵餅會深色啲，因為冇雞蛋，成分只有梘水同麵粉，亦冇蛋麵咁滑，千祈唔好買錯呀。今次用鮮菇代替肉絲，黑松茸菇好爽口，鮮蟲草花又靚又滑，加埋銀芽同韭黃，口感豐富到無肉食都冇所謂啦。

材料：
蛋麵......................1個
黑松茸................180g
鮮蟲草花...............80g
韭黃......................30g
銀芽..........150g(4両)
水......................200ml
蒜蓉..................1湯匙

調味料：
蠔油
生抽
胡椒粉少許
麻油各1湯匙
鎭江醋2湯匙

做法：
1. 水煮滾落蛋麵餅，用筷子散開佢煮2-3分鐘，然後撈起過冷河（沖凍水降溫），之後隔乾水分及用廚紙印乾，待半個鐘等麵條稍乾，銀芽、黑松茸及鮮蟲草花沖洗乾淨備用、韭黃切段。

2. 平底煎pan燒熱落多少少油，落麵條鋪滿整個煎pan，用鑊鏟將麵條稍稍壓平，煎到脆身再煎另外一面，然後轉放碟上，亦可以將麵餅切件再上碟。

3. 煎pan倒去多餘嘅油，落蒜蓉炒香，先落黑松茸及鮮蟲草花炒至軟身，再落蠔油、生抽及胡椒粉炒勻，然後加埋銀芽同韭黃，炒勻之後加水分。

4. 煮滾後加入麻油及鎭江醋，落少少鹽調味再打芡，最後將芡料淋上麵餅，記得大約冚住麵餅嘅三分之二就得。