聞西──爆趣泰式鯪魚餅 用油炸詭咁脆

你就當我唔識食唔識嘢啦，前排有人喺街市見到一條野生黃花魚竟然可以索價六千大元，於是影低擺上網俾大家見識吓，究竟最後有冇人會買呢？呢個就唔知道喇，當然有錢就係任性，你覺得貴時人家當跌咗個銀仔咋。正如有啲酒樓一條魚賣過萬蚊係唔係物有所值呢？你食嘅可能只係虛榮？定話做咗商人眼中嘅水魚呢？

六千蚊如果用嚟買鯪魚肉，足足可以買到125斤，俾我揀一定揀鯪魚肉啦！呢種由細食到大嘅食材，真係可以做出千變萬化嘅菜式，例如將鯪魚肉壓扁煎成魚餅，再用斜刀切成片，就可以用嚟炒菜芯，或者用作釀矮瓜、青椒、豆腐，就係大名鼎鼎嘅煎釀三寶！

至於加豆腐、蛋白攪勻蒸熟，就係一味全家啱食嘅「老少平安」。其實簡單白灼鯪魚球加啲辣椒油，已經係人間美食。一般街市賣嘅鯪魚肉已經有基本調味，當中亦有分有蔥或者冇蔥兩種，買到返屋企一定要加工撻到佢起膠，先至會彈牙爽口，如果冇咁做，口感真係可以差天共地㗎！亦有人話只可以向同一個方向攪，事實上我到依家都唔係好明白點解，不過撻鯪魚肉呢個過程確實幾治癒，最啱用嚟發洩內心嘅鬱悶同不滿，哈哈！

今次我會用鯪魚肉做泰式魚餅，唔止咁簡單，為咗增加口感，我會用嚟釀油炸鬼再炸脆，調味方面有啲貪心用咗泰國紅、青咖喱醬，一個餸有兩款味道，係好得意㗎。用剩咗嘅咖喱醬，又可以用嚟煮咖喱雞或者炒飯，總之你肯煮就會有無限嘅可能啦！

材料：
鯪魚肉......................................半斤
青豆角......................................3條
紅辣椒...............................2至3隻
檸檬葉...............................2至3片
油炸鬼......................................半條

調味料1：
泰國紅咖喱醬......................1.5茶匙
粟粉.......................................1茶匙
魚露....................................1/4茶匙
胡椒粉......................................少少

調味料2：
泰國青咖喱醬......................1.5茶匙
粟粉.......................................1茶匙
魚露....................................1/4茶匙
胡椒粉......................................少少

做法：
1. 將檸檬葉摺疊，就可輕鬆去除中間硬嘅部份。然後切葉成幼絲、青豆切成幼粒、紅辣椒切碎。

2. 鯪魚肉半斤分成兩半，分別放入大碗中，各自加入調味料，拌勻之後用手撻十次八次直至起膠。

3. 將檸檬葉幼絲、青豆粒及紅辣椒碎加入鯪魚肉拌勻。油炸鬼搣開一半，再垂直切開一半，然後分別釀入兩種口味嘅鯪魚肉，然後切件。

4. 由於炸熟鯪魚肉比油炸鬼要耐啲，所以燒熱油後先炸香鯪魚肉嗰邊，然後翻轉炸埋油炸鬼嗰邊。炸好之後，怕太油可用廚紙吸走多餘嘅油份上碟。