十月份仲係三十幾度,大家好似習以為常咁,睇吓個月曆其實霜降都就快到,仲係呢個溫度你都咪話唔驚驚,幸好東北季候風終於嚟到,秋風送爽之下又令我想起最鍾意食嘅荔芋油鴨煲。
唔好誤會,今次冇打算分享荔芋油鴨煲食譜,而係想介紹另一個用芋頭做嘅客家人傳統菜式:算盤子。點解叫算盤子?因為整呢個餸傳統上會將芋圓粉團搓成扁圓形,中間再用手指公壓一個凹位,外型就好似算盤上面嘅算盤子咁。對於冇搓麵團經驗嘅朋友仔嚟講,呢個餸係會有少少難度,不過冇付出就冇收穫,自己親手整嘅芋圓真係特別好味㗎,加埋肉碎、蝦米、魷魚、冬菇等配料,我話嘅,你哋試過一定會鍾意!
以前阿嫲教落,揀靚芋頭最緊要夠輕身,唔好以為愈重愈好,因為質地夠乾先代表個芋頭粉嫩,咁樣的芋頭裡面就有淡淡粉紫色幼紋。原來紋理越多代表口感軟糯香甜,所以我鍾意買啲已經切開咗嘅芋頭,一來成個未必食得晒,二來確保唔會買到爛貨,順便可以睇吓啲紫色幼紋夠唔夠多。
材料:
粉類
粟粉10g、糯米粉40g、木薯粉50g
調味(一)
鹽及五香粉各1/4茶匙
調味(二)
黑醬油、生抽、蠔油各1湯匙
做法:
1. 芋頭去皮切細件,隔水蒸20分鐘,然後趁熱加入調味(一),再用叉壓成蓉。之後,加入粉類搓成粉團,再加油及適量水份,繼續搓直至粉團變得軟滑,水可以逐少加方便調控份量。
2. 將搓好嘅粉團搓成粗條並切粒,再逐粒搓成扁圓形,中間用手指公壓一個凹位,如此類推。煮一鍋水加少少油鹽,落芋圓灼熟會自然浮起,撈起便浸凍水降溫。
3. 預備其他材料,細蝦米、細土魷乾及冬菇浸軟。蝦米及土魷乾都唔使太大隻,土魷乾要切成幼絲,冬菇就切粒,蒜頭及乾蔥頭剁碎,食辣嘅可以準備辣椒粒。
4. 落油起鑊先炒香蝦米同冬菇粒,之後落豬肉炒勻,留意豬肉不用調味,將土魷乾、蒜蓉、乾蔥蓉同辣椒粒落鑊炒香。
5. 加調味(二)炒香,再將芋圓回鑊炒勻,加少少水冚蓋煮1分鐘。最後喺鑊邊落啲紹酒及麻油提香,喜歡的話可以加芫荽蔥粒,炒勻即可上碟。
型色‧煮意
生活
學習