聞西──焗豬扒飯 只要多層次汁著好食

近排因為一個焗豬扒飯，掀起飲食界少少風波。事緣有一位知名食評家，對筲箕灣一間米芝蓮推介食店嘅焗豬扒飯作出點評，內容我就唔重複喇，不過足夠令人反思究竟我哋畀錢食咗啲咩，尤其係佢收80蚊一個人頭計嘅焗豬扒飯喎。事實上，去到呢個焗豬扒飯遍地開花嘅年代，再講正唔正宗已經冇乜意思，反而好唔好食、是否貨真價實呢啲硬指標，就任何時候都適用。真係要多謝仲肯發聲嘅朋友仔，咁樣世界先會有進步嘛！

好多人以為焗豬扒飯個汁，係茶餐廳嗰啲螢光汁又或者係茄汁做嘅，當然無咁簡單！其實佢係由法式料理中，五大母汁之一Sauce Espaynol演變出嚟嘅，當中包括麵撈（牛油炒麵粉）、蕃茄膏、肉汁及蕃茄醬，所以大家食到個汁係有層次㗎，亦係我哋由細食到大嘅焗豬扒飯味道。至於豬扒使唔使上粉去炸？我就覺得冇乜所謂，身邊甚至有朋友鍾意食鬆肉粉豬扒，真係百貨應百客啦！好似話盤古初開嘅焗豬扒飯，係無加菠蘿同芝士，咁加唔加就由你自己決定喇，今次係我第一次自己整焗豬扒飯，我梗係會自己讚自己㗎，反正你哋無機會試味！哈哈……

材料：

豬扒.............1至2塊

蕃茄...................250g

洋蔥...................150g

白菌...................100g

雞蛋.....................1隻

冷飯.................1大碗

mozzarella芝士碎適量

汁料：

牛油................50g

普通麵粉.........50g

上湯............500ml

蕃茄膏.............30g

蕃茄醬.............50g

茄汁................50g

糖................1湯匙

鹽...................少許

做法：

1. 先把豬扒洗凈抹乾，切斷筋位再用刀背拍鬆。有人會蘸蛋汁撲麵粉再煎，不過我鍾意加少少鹽調味，就直接煎至兩面金黃。

2. 冷飯加入蛋漿盡量撈勻，然後炒至乾身，洋蔥、菠蘿及白菌切件備用。

3. 細火將牛油煮溶，加入麵粉炒2至3分鐘，由順滑變成呈現空氣感狀態，之後加入蕃茄膏炒勻，然後熄火。

4. 加入上湯徹底拌勻，切記要熄火，否則麵粉被煮熟就好難再溶入上湯。之後，開火邊煮邊攪拌至開始濃稠，再加入蕃茄醬及茄汁拌勻熄火。

5. 洋蔥、白菌炒香，再加入蕃茄及菠蘿炒勻，然後倒入「步驟（4）」嘅醬汁，用細火煮10分鐘，以鹽調味後熄火。

6. 將適量炒飯放入焗盆，放上豬扒再落大量醬汁，感覺好澎湃啊！個人喜好，我會落大量mozzarella芝士碎，然後放入預熱200度嘅焗爐焗10至15分鐘，直至表面金黃即可。