聞西──羅望子炒雞柳 酸示泰式話語權

 2022-12-01
聞西──羅望子炒雞柳 酸示泰式話語權

上個禮拜終於輪到我出關,出關第一站就係去曼谷,差唔多三年冇去過機場,感覺好熟悉但又陌生,好多嘢都已經改變咗。好似由元朗去機場,宜家可以行屯赤隧道,唔使半個鐘已經到,係就係快咗好多,不過唔慣見唔到青馬橋囉!泊好車入到離境大堂,感覺有啲冷清,好多舖頭都關門大吉。


好開心曼谷已經真正在復常中,雖然遊客未回復正常水平,市面都算熱閙,聖誕氣氛濃過香港好多。除咗「搭鐵」大家會主動戴口罩之外,街上面大部份人已經冇戴口罩,開心可以再呼吸自由嘅空氣,完全唔怕俾人拉或者歧視。此行另一個目的,就係去探望Koy老師,佢係曼谷人氣Sompong Thai Cooking School嘅老闆兼老師。呢度嘅學習氣氛好開心,遊客可以真正學到一啲煮泰國菜嘅基本知識,唔係淨呃like咁簡單,老師會帶同學去街市認識各類食材、點樣去處理材料,當然要大家落手落腳去做,最後仲可以齊齊食返自己嘅製成品添。如果去曼谷不妨試試,但記住要預先book定喎。


今次分享我上堂其中一個學到嘅食譜,叫「羅望子炒雞柳」,當中會用到一種大家可能聽過但好少見到嘅食材:羅望子。喺東南亞,羅望子可以係水果、果乾或者調味料,總之非常受歡迎,原因係酸酸甜甜嘅味道好開胃,亦可以去除魚腥同肉膻味。至於入廚,通常會用果乾那種,只要加點熱水,用手按摩一下就會成為羅望子醬,而且果乾可以儲存好耐。當然,市面都有現成嘅羅望子醬賣,但味道始終差少少。




材料:

雞柳…………4

即食腰果………50g

蔥……………1

紅辣椒………1

洋蔥…………半個

辣椒乾………適量

椰菜……………100g

羅望子果乾…1




調味料:

羅望子醬………3湯匙

椰糖…………………20g

生抽…………1湯匙

黑醬油或老抽…1湯匙

魚露……………1湯匙

蠔油……………1湯匙

水份……………1湯匙


做法:

1. 如果你買到羅望子果乾,可以將1條羅望子果乾放入100ml暖水,再用手指按壓,直至啲果肉溶解變成果醬。太杰可加少少水,又或用現成嘅羅望子果醬代替都得。






2. 準備各樣材料:椰菜、洋蔥、紅辣椒全部切片,蔥切段、蒜頭剁成蓉、辣椒乾切段,雞柳去筋後切片。





3. 冷鑊落油及蒜蓉,開中火將蒜蓉炒香。之後落雞柳片炒至全熟,再落洋蔥、辣椒乾炒勻。




4. 落調味料及椰菜炒香,再落腰果、紅辣椒片及蔥段,再轉大火炒多15秒熄火上碟,最後撒少少白胡椒粉即可。






厚多士」提示

椰糖硬過石頭

羅望子果乾\醬、椰糖可以喺泰國雜貨舖買到,椰糖有乾濕兩種,乾嘅可以存放一年,因為好硬每次用都比較麻煩,軟身嗰種容易用,但只可以放半年左右。記得椰糖唔好放入雪櫃,會硬過石頭㗎,哈哈!



型色‧煮意

生活

學習



相關文章


聞西──苦盡甘來的美味 花蟹炒苦瓜型色‧煮意

聞西──苦盡甘來的美味 花蟹炒苦瓜

有很多為人父母的朋友都向我訴苦,現在小孩都喜歡揀飲擇食,買餸愈來愈有難度。回想我小時候就沒有這...

聞西──潮式煮法好滋味 豆醬雲耳炆雞翼型色‧煮意

聞西──潮式煮法好滋味 豆醬雲耳炆雞翼

朋友笑說:「我阿媽最叻煮雞翼,梗係啦!每個禮拜都煮一次,因為佢知我鍾意食囉!」這位人兄分明在「...

聞西──夏日消暑佳品 泰式夜香花炒粉絲型色‧煮意

聞西──夏日消暑佳品 泰式夜香花炒粉絲

俗語有話不時不食,任憑農業技術幾先進都好,有些食材就係「唔到你話事」,啱時候才會登場。今次介紹...

聞西──七姐誕期間限定!清甜蘋婆燜排骨型色‧煮意

聞西──七姐誕期間限定!清甜蘋婆燜排骨

這陣子元朗變成社會的焦點,暴力事件發生後,真假消息不斷傳出,大家都變成驚弓之鳥,我因為住在元朗...

聞西──西檸煎雞變熱情果脆雞型色‧煮意

聞西──西檸煎雞變熱情果脆雞

每個人都有失魂的時候,不過,我發生的機率好像比別人高一點。話說本來想買番薯粉做炸雞扒,回家後卻...

聞西──深夜食堂の日式回鍋肉型色‧煮意

聞西──深夜食堂の日式回鍋肉

半夜看日劇《深夜食堂》真的好容易出事,那夜終於抵受不了愈夜愈肚餓的魔咒,身不由己走進廚房,拿起...