聞西──煙韌控必試！韓色年糕炆牛肋條

今個冬季雖已過了大半，但相信好多人都會覺得這個冬天不太冷。日前天文台發文指出，今年冬天將會成為有紀錄以來香港最溫暖的冬天，很大可能打破自1884年以來的紀錄。

雖然天氣不似預期般冷，但仍無損我們吃煲仔菜的慾望。今期就同大家分享一個韓式炆牛肋條年糕。小時候每逢冬天，我阿嫲最鍾意煮蘿蔔牛腩煲，正所謂不時不食，冬天的蘿蔔最甜美，阿嫲教買蘿蔔時要揀重手那種，最緊要畀完錢之後叫菜販切開個蘿蔔，如果是空心或者有黑點就會有苦味，一定要換呀。又或者買韓國或日本進口的就最穩陣，不過，今次我用了日本甘筍代替都好好味！

依家靚牛腩真係有錢都未必買到，所以我會用牛肋條代替，它的好處是牛油充足，而且好快腍。如果喜歡食牛筋就要去凍肉店買。今次我會沿用阿嫲的豉油蠔油冰糖配方另加韓式辣醬，少少辣好襯牛脂香味。這個汁配年糕相當精采，如果你是「煙韌控」就一定要試試啊！記住隔晚先食，等年糕入味效果會更好！

材料：
洋蔥1個200克
牛肋條600克
蒜頭6粒
甘荀300克
韓國年糕300克
冰糖25克

醃料：
生抽30毫升
紹酒30毫升
胡椒粉1/4茶匙
韓式辣醬3湯匙
油1湯匙
蠔油1湯匙

製法：
1. 牛肋條切件，落醃料及拍碎了的蒜頭醃半個鐘，洋蔥切粗條。

2. 燒熱鍋落油先爆香洋蔥，然後再加入牛肋條炒香。

3. 加水冚蓋用慢火炆煮約個半鐘，如果不是用鐵鍋就要加多點水。

4. 直接加入年糕拌勻，大約煮多15分鐘便可熄火。最好隔夜先食或者放上半日，讓年糕充分入味那就更加好味了。
（注意：加入年糕後要不時攪拌，因好容易煮燶）