脆肉瓜炒雞柳 泰好送飯

上星期已經連續幾日零確診，香港嘅疫情終於漸見曙光，呢幾個月大家都唔好過，不過日子點樣都係要過，惟有咬緊牙關捱過疫情吧！

我經常同朋友講，宜家仲有工返真係要感恩，上星期睇到一則新聞，曾任新聞主播和空中服務員的林子恒先生，2月中被航空公司解僱，馬死落地行加入外賣大軍，新工作雖然日曬雨淋風吹雨打，不過子恒思想都好正面咁話：職業無分貴賤，都係工一份，最緊要養活到自己，佢仲話好慶幸有呢個工作機會，突然冇咗份工梗係會徬徨，不過佢留意到疫情下多間外賣公司應徵人數倍增，就係咁一擊即中搵到呢份工！

我好佩服佢呀，不止能屈能伸，而且處變不驚咁去面對困難，實在值得我哋學習，最怕有啲人日呻夜呻，好似個世界欠咗佢咁，其實每個人都應該對自己負責，學我阿嫲話齋，有手有腳勤勤力力又點會餓死人呢？搵少咗咪食平啲囉，唔使扮嘢話等街市閂門去執爛菜咁慘嘅，好似我今次介紹呢個泰式快炒雞柳咁，成本唔使20蚊已經足夠送一大碗白飯，賣相食味一啲都唔失禮，泰式快炒啲肉唔使醃慳返好多時間，幾個字就可以開飯，夜啲放工煮都無問題啦！

材料:
脆肉瓜半條180g、急凍雞扒半塊180g、大紅椒半隻（裝飾用可不放）、雲耳（乾）10g、蒜頭2粒、乾蔥頭1個

調味料:
泰式辣醬2湯匙、魚露1.5湯匙

做法:
1. 急凍雞扒切絲、脆肉瓜打直切半再切成厚片、大紅椒切片、雲耳浸軟備用，蒜頭略拍、乾蔥頭切片

2. 冷鑊落油加入泰式辣醬、蒜頭及乾蔥頭，然後開細火慢慢炒香

3. 加入雞扒絲轉中火炒至半熟，然後加入脆肉瓜及雲耳炒勻，倒20ml水份冚蓋煮半分鐘

4. 加入紅椒片炒勻，最後埋芡即可

小知識:
泰式辣醬係泰國常用醬料，喺泰國雜貨舖有售，味道帶甜少辣。泰式快炒通常都會用到魚露調味，鹹香及甜味真係一對好拍擋，如果想更有泰式風味熄火前可以加啲金不換㖭。