聞西──送酒一流！ HOMEMADE炸蝦餅其實唔難

我自認係一個六根不淨嘅人，經常都有朋友勸我食少啲、食健康啲、飲少啲酒，即係你為咗長命百歲，所以成世人都戒口戒酒？咁嘅人生似乎唔係幾啱我，生活，絕對唔係為咗「活」咁簡單，中間嘅過程先至最重要，就住就住咁過日子你話幾痛苦呢！

我好鍾意食午餐肉，不過午餐肉好肥係人都知，但如果餐蛋麵冇咗餐肉會係咩世界呢？就係世界末日囉！哈哈……與其叫人戒掉，不如搵啲健康啲嘅代替品，最近我就試咗一隻由純素材料製造嘅植物餐肉「OmniPork Luncheon新餐肉」，味道方面真係好鬼似，質感比較乾身，咁始終冇豬油嘛，呢方面我覺得可以接受，一睇佢係0毫克膽固醇、高蛋白質、提供膳食纖維、鉀及鈣，低脂少鹽，同時零殘忍、非基因改造、無添加激素、抗生素及味精，不含防腐劑硝酸鹽，不含蔥蒜等等等等，真係食多咗都唔會有罪惡感呀。

我對蠔敏感，所以已經好多年冇食蠔餅，唔知幾時先會有「新蠔」產品出現呢？哈哈！不過未出現之前，我就用咗韮黃同蝦代替，除咗咁我仲加埋泡菜落去，蝦餅嘅粉漿用番薯粉加麵粉開成，口感略帶煙韌，餅邊好脆口，效果真係唔錯，食嗰陣可以沾韓國拌飯醬，咁就最perfect喇！

調味料:
韓國拌飯醬2湯匙、鹽1/2茶匙、胡椒粉1/4茶匙

做法: 

1. 番薯粉、麵粉、鹽及胡椒粉加入水份攪拌成粉漿

2. 蝦仁、韮黃、泡菜切粒，莞茜切碎

3. 蛋漿及韓國拌飯醬全部加入粉漿拌勻

4. 一湯匙份量粉漿倒入熱油，炸至兩面金黃即可撈起

小貼士：
港式蝦餅重點係油炸，油溫一定要夠熱，用最短嘅時間炸起蝦餅，咁就唔會肥淋淋，趁熱食最好味！