聞西──炎夏留家歎韓風 鳳眼安東雞配蒟蒻麵

買餸有時候同做人一樣，有好多不似預期，往往你諗住買乜就冇乜。

話說今期原本打算煮個炆雞，要用到一種韓式醬料「春醬」（韓式黑豆醬），就係煮韓式炸醬麵嘅主要調味料。之前喺元朗大馬路韓國食品專門店先見過有得賣，點之收工去到買嘅時候，店員竟然話賣晒，聽日先返貨喎。究竟係咪玩緊我呀，其他材料都已經買好晒，咁點算好呢？行緊去搭輕鐵嘅時候，突然發現街邊有個婆婆喺度擺檔賣鳳眼果（蘋婆），咁不如煮鳳眼果炆雞啦。既然都諗住煮韓式，咁又不如用安東燉雞嘅煮法啦，就整成咗呢個「鳳眼安東雞」食譜出嚟喇！

後生細仔可能對鳳眼果比較陌生，城市地方就算去街市都未必有得賣，不過我住元朗區，每年七、八月左右，都有好多婆婆喺街邊賣鳳眼果。鳳眼果屬木本植物，因為豆莢包住兩粒黑色嘅果實，睇落就好似美人對眼咁，所以叫鳳眼果，口感介乎栗子與番薯之間，真係幾特別㗎。

今次好好彩，買到已經剝咗層黑色外皮嘅鳳眼果，如果唔係就要放入滾水煮10分鐘之後去皮。不過，功夫只係慳咗一半咋，因為𥚃面仲有另外一層衣，同樣要放入滾水煮15分鐘，咁先易啲剝走而見到黃色嘅果肉。安東燉雞係一味韓國家常菜，突然醒起調味料要用到韓國燒酒，於是我又要行返轉頭去買喇……sad！

材料 :
雞鎚仔半斤
甘筍100g
脆肉瓜100g
鳳眼果肉半磅
蒟蒻麵150g
蒜蓉1湯匙
薑3片
紅辣椒1至2隻切粒
麻油2湯匙
白芝麻小許
水250ml

鳳眼果

調味料 :
韓國燒酒2湯匙

蠔油1湯匙
韓國或日本醬油4湯匙

黑糖2湯匙

做法 :
1. 雞鎚洗淨抹乾、燒熱易潔平底鑊落油，放雞鎚煎至少少金黃。

2. 然後落麻油及蒜蓉、薑片及紅椒粒炒香。

3. 加入調味料、甘筍件、脆肉瓜件及處理好嘅鳳眼果，炒勻就可以加水，滾起計先炆10鐘。

4. 加入蒟蒻麵拌勻，再煮多5至10分鐘直至收汁就可以上碟，最後唔少得撒少少韓國菜必備嘅白芝麻增加風味啦！

小貼士 :
如果想脆肉瓜爽脆啲，可以留待落蒟蒻麵嘅時候先放。另外安東雞食譜係用韓國冬粉，但因為我買唔到，所以改用家中儲糧蒟蒻麵。冬粉要先浸軟先用得，份量約50g就夠。