聞西──人參煲烏雞 配糯米藜麥同釀好味

 2020-10-22
聞西──人參煲烏雞 配糯米藜麥同釀好味

根據我非正式統計,身邊十個朋友裡面有十一個都好唔鍾意做家務,咁都好正常啫,屋企唔係有媽咪照顧,就係有工人姐姐!我就冇咁好彩喇,細細個已經要幫手做家務,不過我唔係被逼㗎,嗰陣時我阿嫲年紀已經唔細,仲要照顧一家九口嘅起居飲食,真係好辛苦,所以我都會主動幫輕佢。每次做完家務,阿嫲都會讚我,有時仲會有零食獎勵,就係咁培養出我鍾意做家務嘅變態性格(朋友話㗎),哈哈。

講咁多,除咗讚自己乖仔乾淨又整齊,重點係想介紹大家睇一個關於清潔嘅節目,就係逢星期日晚八點ViuTV96台播嘅「清潔狂大作戰」。每集揀兩個超級污糟邋遢嘅屋企,再安排兩個有嚴重潔癖嘅人去幫手做清潔,呢個反差場面的確會令觀眾笑到碌地。清潔過程中,仲有好多衝突場面,亦有好多故事,最深刻係講一個媽咪,小朋友因病離世,為咗麻醉自己,所以每日花好長時間做家務,另外亦有人因為婚姻失敗自暴自棄,成間屋變咗垃圾崗。每次節目尾聲,例牌會介紹番清潔成果,而最重要係喺清潔過程中,雙方都學習到面對自己內心,重整自己嘅生活,真係好有意思!

做家務咁辛苦,係時候煮啲好嘢慰勞一下肯為你做家務嘅至愛。依家秋高氣爽,最啱食人參雞補下身,不過喺韓國就算天熱都一樣會照食人參雞湯,當地人叫「以熱制熱」,令身體出汗降溫,同時補充流汗失去嘅養分。人參雞湯做法同樣將糯米釀入雞肚,如果你唔鍾意食糯米可以試吓改用藜麥,或者好似我咁兩溝都得。至於隻雞,今次買唔到春雞,買咗隻一斤左右大嘅烏雞代替。人參就唔一定要用晒整支,可以用參鬚、參片或者鮮人參都可以。仲有最重要係凍水落雞,雞肉嘅甜味先會釋放出嚟。