聞西──蝦醬豬腩小炒王 不爐而鑊更惹味

週末行超市已經成為我生活嘅習慣，一個人究竟可以食幾多嘢呢？其實真係唔多㗎，但係連我自己都唔明白，即使每個禮拜去超級市場，結果都係會買到一大袋返屋企。前排好多朋友都另外添置個冰櫃放凍肉，一家四口咋喎，屋企附近已經有超市有街市，你估喺外國揸成個鐘頭車先買到餸咩！不過疫情之下，大家最缺乏嘅就係安全感，以我為例：屋企嘅儲糧真係一個月唔出街都唔會餓死，諗諗吓係時候要清一清個雪櫃先。

咁就俾我喺倉底搵到包急凍荷蘭五花腩肉，喺一斤豬肉過百蚊嘅情況之下，急凍肉真係一個好好嘅選擇。預先包裝好，可以按自己喜好慢慢揀，呢樣嘢喺肉檔就冇乜可能喇。呢包五花腩真係有五層㗎，而且肥瘦適中，不過一包有6條厚切五花腩片，就算小家庭都未必食得晒。今次用咗兩條做小炒王，剩低嘅就用韓國辣醬同埋韓國燒酒醃好，兩日之後又可以同朋友一齊食韓式燒烤。

一般小炒王都係有韭菜、蝦乾、豆腐乾之類嘅材料，有個講法話呢啲食材其實係以前嘅人用嚟拜神嘅祭品，祭祀後唔想嘥嘢炒埋一碟就算數。按照呢個講法，其實加咩都得，不過小炒王最重要有鑊氣，如果你屋企係用電磁爐嘅話，效果始終差啲。今次我將五花腩加蝦醬醃完再炸脆，可以將豬油迫出嚟，咁樣就冇咁油膩更加香口，而炸嘢最好用個細鍋仔，打側少少就可以減少油份。另外我會用穀糠油，係又平又健康嘅選擇，如果唔想炸嘢可以預先將五花腩片煎香都得。

做法 :

【小貼士】
其實韭菜花嘅花好靚㗎，切咗出嚟我會放杯仔用水養住佢等開花，擺喺餐枱裝飾一下都唔錯㗎！