聞西──爆脆炸蝦棗 腐皮係關鍵

 2020-12-03
聞西──爆脆炸蝦棗 腐皮係關鍵

近排喺公司真係忙到人都癲,因為同事們都要清假。正所謂「他朝君體也相同」,大家都有放假嘅時候,所以冇乜好埋怨㗎,唔夠人就密密做囉。點解到年尾仲會有咁多假未放?因為大家原本都想博下疫情會唔會緩和,睇下有冇得去旅行咁。隨住一個又一個月,一波又一波嘅疫情擴散,呢個旅行夢終須破滅喇。

估唔到跳舞都會跳出個第四波來,我唔敢批評人哋啲乜,自問抗疫期間都有參加啲私人聚會同飯局,係幾個朋友聚一聚嗰種。其實,除低口罩飲酒傾計點都會有啲風險,如果真係不幸中招,大家都要如實報告自己行蹤,免得害到更多人。照形勢咁睇,大家似乎又要閉關一段時間,襯得閒學定啲新菜式,第時有聚會又可大展身手啦。




潮州嘢我最鍾意食鹵水鵝,另外一樣就係四喜拼盤中嘅蝦棗、蟹棗,即係用腐皮包住蝦膠、馬蹄、蔥粒等做嘅餡料,將之先蒸後炸個種。點解叫棗呢?因為似一粒棗咁大囉,蝦棗當然有蝦,傳統做法會加入切粒肥豬肉,我已經夠肥,只好用半肥瘦免治豬肉代替以減低罪惡感。另外,加沙葛或者馬蹄粒都可以,只要爽口嘅就得。特別要留意,腐皮好容易變乾,未用之前最好用密實袋包住,否則又薄又脆好容易散晒,而喺用之前可以用濕布抹吓,就會變到好柔軟方便捲起。