聞西──懷舊芋頭碌雞 醬汁入味唔靠符碌

 2020-12-17
聞西──懷舊芋頭碌雞 醬汁入味唔靠符碌

一年容易又冬至,過往都係阿媽一個人煮十幾個餸,而你你你哋只係識得影相拍片放IGstory呃下like。今年大家都咁得閒,唔係仲打算兩手fing fing咁返屋企做節呀?不如每人煮一味,等阿媽無咁辛苦,多咗嘅時間又可以用嚟傾下偈。今次介紹一個好啱做節嘅食譜:懷舊芋頭碌雞。呢個餸可以預先喺屋企整定,食之前將雞斬件,再加熱啲汁淋上面就搞掂。如果唔食芋頭,轉做生菜底都好夾啲汁㗎。

碌雞呢個餸,係我由客家菜碌鵝「進化」出嚟嘅食譜。整碌鵝首先要將鵝身煎到金黃,之後用磨豉醬、南乳、片糖等調味料煮成醬汁,再將鵝回鑊。為咗要令鵝身上色均勻入味,要將隻鵝不斷咁慢慢碌嚟碌去,碌得次數越多時間越耐味道就會越濃,色澤會越均勻。係咁碌,有時廚師真係手都軟。依家買隻靚鵝都唔係咁容易,就算換做鴨,都要有隻咁上下大嘅鑊先放得落,所以我就用咗隻又平又靚嘅冰鮮雞代替。

我就冇咁好心機將隻雞碌嚟碌去,我又粗手粗腳怕整散隻雞,所以決定先將隻雞炆熟,然後重複將醬汁淋上隻雞度,教細爐火啲汁就自然會慢慢收水。收到差唔多,就可以拎起隻雞攤凍,啲汁就留返食之前先加熱淋上面,就係咁由功夫菜變咗懶人菜,哈哈!