龍蝦伊麵加辣 寒冬又贏一醬

 2021-01-14
龍蝦伊麵加辣 寒冬又贏一醬

好友Jeremy居於南半球澳洲黃金海岸,所以我哋喺香港近排凍到七度八度,佢嗰邊正正係風和日麗陽光普照嘅夏季,點會唔教人又羨慕又妒忌呢!我只可以透過佢WhatsApp嘅相感受吓澳洲嘅好天氣,不過要感受當地嘅美味龍蝦就容易好多,而且平到你唔信!因為某啲原因,以前大量出口去內地嘅澳洲龍蝦,近期冇辦法出口,當地業界唯有將海產出口轉內銷,供應多自然價錢平,有澳洲超市以每隻20澳元出售,即係唔使120蚊港紙一隻。Jeremy話咁樣就叫因禍得福囉,依家隔日就食一次龍蝦,簡直曬到冇朋友!

其實佢真係有所不知,近排澳洲龍蝦已經攻陷咗香港嘅街市,差唔多每檔賣海鮮嘅舖頭都有賣澳洲龍蝦,我今次買咗隻重一斤有多嘅龍蝦嚟煮伊麵都只係200蚊,抵食到冇朋友!抵食嘅仲有好多以前比較少見嘅海鮮,包括阿拉斯加皇帝蟹、日本松葉蟹、甚至游水天使蝦,應該係疫情之下嘅新常態,大家不妨趁平食多啲,當係苦中作樂吧。

一講龍蝦自然想到伊麵,呢個真係一個天生一對嘅配搭。如果食得芝士或者上湯嘅煮法多,可以試吓我呢個辣椒醬龍蝦燴伊麵。龍蝦買返嚟可首先放入冰格半個鐘頭,雪到佢暈陀陀先至煮比較人道。至於個個都話要放尿,即係用筷子篤佢個patpat,海鮮檔老闆話其實唔使㗎,邊有咁多尿呢!你劏開咗佢洗乾淨就得。我就比較懶,會叫老闆幫我開咗邊先,返到屋企再斬件,如果唔怕嘅話,梗係食之前先劏最新鮮啦。至於龍蝦使唔使走油,炸過係會香口啲,不過我覺得喺屋企食冇乜所謂,可能我比較懶啦(笑)!