曾幾何時私房菜大紅大紫,但近年情況已不復當年,無嘢嘅,私房菜呢三個字已經被集體玩殘咗,阿豬阿貓開店都叫自己做私房菜,明明就係食緊酒樓餐廳大路菜,咁你私房啲乜嘢呢?有啲所謂私房菜淨係識以本傷客,乜都加海膽、黑松露、金箔,唔理同啲食材夾唔夾,以為有貴料就可以劏客!
至於我心目中嘅私房菜,就係有自己特色嘅家宴,一般素人家廚(例如小弟)因為冇經過專業訓練或者喺飲食業打滾過,靠嘅係不斷實戰同試驗,加上少少少天份,出品反而更個人化,而且會有一份家嘅味道。我欣賞真正有心做私房菜嘅人,因為實在唔係一件容易嘅事,由設計菜單、諗擺盤、買餸、準備材料、到煮、上菜,甚至洗碗,一腳踢由朝做到晚,都係心機同時間,但係見到朋友食客食得開心,幾攰幾辛苦都係係值得嘅。
只要你不甘心同其他人一樣,你自然會煮出自己嘅風格,我認我啲餸有時都幾「古怪」,就好似呢個韓式蜜瓜鮮魷泡菜沙律,係我一個八年前嘅私房食譜,記得靈感來自韓國菜用水梨入饌,中和辣味或者肥膩。事實上,蜜瓜比西瓜更適合配辣味嘅菜式,因為佢嘅香味唔會咁容易俾其他味道蓋過,而且有解辣作用。今次買唔到魷魚,所以用咗急凍墨魚仔代替,其實配其他海鮮都可以㗎,就試吓做出你自己風格嘅菜式吧!
材料:
日本或者韓國蜜瓜半個(唔使咁大個)、魷魚/墨魚仔或其他海鮮300g、芫茜2至3棵、泡菜200g
調味料:
韓國拌飯醬5湯匙、韓國辣椒粉1湯匙
做法:
1. 芫茜洗淨,用鹽水浸半個鐘,之後用廚紙印乾,切碎備用,泡菜切粗條。
2. 魷魚洗淨鎅花再切成粗條,水煮滾後熄火,落魷魚/墨魚仔浸2分鐘撈起浸冰水溫,再用廚紙印乾。半個蜜瓜一開四,去皮再斜切成厚片。
3. 先將蜜瓜及魷魚放入大碗,加韓國拌飯醬及泡菜汁拌勻,記得試吓夠唔夠味。
4. 落芫茜碎、泡菜及辣椒粉拌勻後上碟,最後可用蜜瓜皮圍邊做裝飾。
提提你:
留意沙律唔可以整定,因為蜜瓜遇到調味好快會出水同變腍,整好就要即刻食喇。
型色‧煮意
生活
學習