聞西──沙嗲牛韓粉絲 炒出創意就有壯志

最近好多人討論「夜市」呢個題目，其實呢啲民間經濟早已經存在喺香港，正所謂「高手在民間」。以前各區各處都有街頭小販，簡單如一架木頭車，一枝擔挑兩個藤籃已經可以做生意，大家都攞出自己嘅看家本領，食嘅買嘅都好有特色，就好似其他國家嘅夜市或者路邊小攤檔，除咗可以吸引旅客之外，更加係當地人嘅生活一部份，甚至乎係解決一日三餐嘅好地方。

我以前住公共屋邨，每逢農曆新年街市都會有幾日休息，並搖身一變成為美食天堂，管理人員識做隻眼開隻眼閉，小販自然放心擺賣，而且有好多明火攤檔，真係乜都有得食！我最鍾意一檔豉油皇煎腸粉，木頭車仔上面有個大平底鑊，旁邊仲有個不鏽鋼箱蒸煮啲腸粉，有人order大叔就會拎幾條出嚟放落鑊，再落特製嘅甜黑醬油，真係香到全條街都聞到！呢幾年不斷有啲墟市、市集出現，可能管理得太好，又無明火煮食，而且價錢一啲都唔親民，氣氛同吸引力同以前比真係差好遠。

如果香港再有夜市，麻煩啲參與者畀多啲創意，唔好再全場賣香咖喱魚蛋、雞蛋仔、糯米糍呢啲喇。今次我將經典大牌檔菜式沙嗲肥牛粉絲煲，同韓國炒粉絲crossover，充滿香港味道之餘又有特色，真係既可當小食又可做正餐。韓式粉絲係用蕃薯粉做成，口感QQ的有韌度，凍咗都唔會黐埋一舊，一般韓國炒粉絲配料都有洋蔥、紅蘿蔔、冬菇、牛肉等等，其實配料都好隨意，就按自己喜好選擇吧。由於配料比較多，我提議一次過煮多少少慢慢食。

材料：

韓國粉絲............250g

肥牛片...............200g

洋蔥.....................1個

金菇.....................1包

紅黃燈籠椒.....各1個

菠菜...................200g（或者用椰菜代替）

乾蔥頭.................2個

蒜頭.....................4粒

水.....................150ml

調味料：

沙茶醬.............2湯匙

咖喱醬.............2湯匙

生抽.................2湯匙

紹酒及麻油......2湯匙

做法：

1. 首先處理韓國粉絲，煲滾一鍋水後直接落韓國粉絲煮。由於韓國粉絲比較粗身，所以要煮耐少少，當煮到變咗透明即代表熟，之後撈起過冷河備用。

2. 準備其他材料：蒜頭及乾蔥頭剁碎，金菇切去根部並分成小撮；紅黃燈籠椒、洋蔥及肥牛片全部切粗條，菠菜洗淨切去根部。

3. 中火燒熱鑊落油，落洋蔥爆香後，加入沙茶醬、咖喱醬及蒜蓉乾蔥頭蓉炒香。然後，落牛肉炒勻，灒酒，加入水分煮滾，可以落少少鹽調味。

4. 煮滾後加入韓國粉絲、菠菜及金菇，炒至粉絲乾身，再落紅黃燈籠椒絲。最後落麻油炒勻，即可熄火上碟。