聞西──栗子「一炆雞」 香甜粉糯冇得揮

終於捱過炎熱夏天，而家乾爽又涼浸浸嘅天氣，真係好好好舒服。呢個時候亦係栗子當造季節嘅開始，同移居英國多年朋友傾開計，佢話每逢秋天都會去執栗子食，我話英國生活有冇咁慘呀？佢話你要畀錢買先慘呀，英國好多公園、森林郊區地方都有野生栗子樹，栗子隨地都係，而且野生栗子更加香甜。不過，由樹跌落嚟嘅栗子有個帶尖刺嘅外殼，佢話執嘅時候都要份外小心喎。

由細到大我都好鍾意食栗子，好欣賞佢嘅香甜粉糯嘅口感，每逢秋冬都會叫嫲嫲買栗子食，而家街市賣嘅栗子都已經剝殼去衣，如果見到有好多黑點或者被蟲咬過嘅窿，就唔好買喇！以前無咁幸福，要食就要自己剝栗子，揸住錘仔小心地將栗殼破開，再將栗子肉放入滾水煮十分鐘，之後襯熱去衣，可謂粒粒皆辛苦。

如果買唔到已經去衣嘅栗子，其實有個簡單嘅方法去衣，就係將栗子放入微波爐叮大約一分鐘，然後放喺兩塊乾布中間，再用手掌輕力搓幾下，啲栗子衣就會自動甩晒！街市賣嘅栗子最常見有油栗同桂林錐，油栗有一邊扁平，桂林錐體型較圓小，好容易分辨到。至於肉質，油栗就較實，適合煲湯或者長時間炆煮，我今次用嘅係桂林錐，口感香甜粉糯，但係炆得太耐好容易散晒溶咗，所以唔好買錯啊！

栗子用嚟炆雞炆排骨都咁合拍，除咗用豉油蠔油調味，仲可以試吓台式三杯雞嘅煮法，薑同麻油嘅味道超級暖胃，超級香濃，秋冬就係要食飽啲啊（雖然已經好肥）。

材料：

栗子........1磅

雞下髀....8隻

薑.............40g

栗子........1磅

雞下髀....8隻

薑.............40g

蒜頭........8粒

九層塔....2棵

青紅椒...各1隻

米酒........3湯匙

麻油........3湯匙

豉油........3湯匙

糖............1茶匙

做法：

1. 先準備所有材料：如上文所提及嘅方法幫栗子去衣，留意微波爐加熱後嘅栗子非常熱，小心焫親手。

2. 薑切片、蒜頭略拍、青紅椒切片、金不換淨係要葉、雞下髀斬件，落少少鹽及胡椒粉撈勻醃15分鐘。

3. 冷鍋落麻油、薑片及蒜頭，再以慢火煎至出味，然後落雞件炒香。

4. 之後落豉油炒勻，再落栗子及米酒，炒勻之後落約200ml水，冚蓋細火煮30分鐘。記得中途要翻一翻啲材料，水太少就要加返少少。

5. 落青紅椒片及九層塔葉，快速炒勻就可以熄火。上菜前落少少麻油，味會更加香啊。

【小貼士】

1. 麻油一定要用細火，否則會出苦澀味。

2. 黑麻油營養價值較高，多用嚟煮滋補菜式，買唔到用白芝麻油代替都得。