啲人成日都講疫情之下要適應新常態,包括去旅行都一樣,Staycation就係咁應運而生。其實,就係Stay喺香港過Vacation嘅意思,老人家我一向都唔係好接受Staycation,屋企好地地咁舒服做乜要去瞓酒店呢?
不過早兩個星期,同一大班朋友仔去咗紅棉路嘅Murray Hotel Staycation之後,我對呢個字完全改觀,原來真係好有「旅行」嘅感覺㗎。雖然只係兩日一夜,由執「行李」開始,心情已經平復唔到,一直好興奮呀!最搞笑係怕帶漏嘢,哈!
今次嘅Staycation真係與衆不同,因為Murray係間容許主人帶埋寵物一齊入住嘅酒店,部分公共地方可以俾寵物入埋去。一入大堂checkin就相當震撼,好多狗狗好熱閙,攞房之後我哋就去咗參加Pawsfortea下午茶,啲嘢食真係好精緻,有骨頭做形嘅鬆餅,不過係人食嘅。現場所見九成以上都係狗狗,大家都掛住影相唔係好記得食嘢喇,嘻嘻......
晚飯前,去咗露天酒吧飲嘢,一杯雀仔造型嘅cocktail襯托住中環黃昏,未飲已經醉咗。晚飯之後各自返房,好忙:因為要影相打卡、浸浴,摸住酒杯底睇電視嘛,好爽!第二朝食完個靚靚早餐之後,約埋朋友仔去行兵頭花園,當localtour啦!對上一次嚟已經係幾十年前,之後返酒店checkout,兩日一夜好快過,有啲唔捨得添。
世事就係咁,唔試唔知有幾好,就好似過時過節都會整白切雞,只要經過煙燻處理,就會變成好有特色嘅茶燻雞,味道同外表立即加晒分。煙燻就係利用糖輕微燃燒產生嘅煙香,為食物加添色香味,其實好多嘢都可以「燻」㗎,例如糖心蛋、魚呀等等。整嘅時候,記得開大個抽油煙機,否則全屋都係煙味就大件事喇!
材料:
煮熟雞肶2隻、砂糖1湯匙、麵粉2湯匙、任何茶葉1湯匙、麻油適量、錫紙1塊
做法:
1. 雞肶用粗鹽、胡椒粉醃一個鐘,然後蒸25分鐘,之後攤凍備用
2. 放一張錫紙喺上邊,落砂糖,然後用麵粉蓋住砂糖,上面撒上茶葉,再放上蒸架及雞肶
3. 開細火慢慢加熱直至出煙,先燻3分鐘,之後熄火再燻3分鐘
4. 取出雞肶掃上麻油,切件上碟食晒!完
小貼士:
1. 要用高腳蒸架,等鑊𥚃面空氣流動暢順,味道先會均勻
2. 用任何茶葉都可以,但以花茶味道最突出。
3. 想煙燻味道濃烈啲,可以燻多一至兩分鐘,外表嘅顏色都會深色啲。
4. 不宜燻得太耐,否則會有燶味並掩蓋食物原味。
型色‧煮意
生活