聞西──乾肉骨茶 香味入肉入骨

通關之後，人人報復式旅行，大家收到手信嘅機會自然大增。我認為手信可以分為兩種，一種係無意識狀態下買嘅，即係求其是但買，另一種就係度身訂造，因為重視朋友嘅感受，會按朋友嘅喜好而買。慶幸身邊嘅朋友都知道我鍾意煮嘢食，所以大部分收到嘅手信都係調味料，哈哈！上個禮拜，又收到同事送畀我嘅馬來西亞肉骨茶湯包手信，忽然想起「乾肉骨茶」呢個餸。

其實，網上面都有好多肉骨茶嘅食譜，之前我都介紹過，不過來來去去都係改下啲藥材或者調味料。之前做資料搜集時發現，肉骨茶發源地馬來西亞「巴生」地區，做法竟然有乾、濕之分。話說，乾肉骨茶係由當地其中一家肉骨茶名店發明，以乾式去呈現肉骨茶風味，創造一種全新食法，結果大受歡迎，之後更被無數餐廳仿效。

乾肉骨茶係用煮好嘅肉骨茶肉及湯，加埋魷魚乾、蒜頭、辣椒乾等惹味材料，以蠔油、黑醬油等調味料炒到收汁而成，今次我貪方便用咗零食魷魚鬚，結果有驚喜喎！辣椒乾及豉油味完全滲透晒入肉裡面，同時又食到肉骨茶嘅味道，炒至尾聲喺鑊邊灒少少紹酒，香味會更上一層樓，係一個聞到同睇到都好想食嘅餸！

調味料：

黑醬油.................2茶匙

生抽.....................1湯匙

蠔油.....................2湯匙

糖.........................1茶匙

材料：

排骨.......................400g

甜豆.......................150g

連皮蒜頭..................2個

蒜蓉.....................1湯匙

薑.............................3片

乾辣椒...................10隻

魷魚鬚.....................40g

肉骨茶湯包.......1至2個

紹酒.....................1湯匙

水.........................1公升

做法：

1. 排骨先出水再沖洗乾淨，連皮蒜頭同樣沖洗乾淨，準備薑片及蒜蓉。

2. 蜜糖豆去衣，用滾水灼15秒撈起。魷魚鬚用清水浸5分鐘後，再揸乾水備用。

3. 準備小煲倒入1公升水，加入排骨、連皮蒜頭、薑片及肉骨茶湯包，滾起計煲半個鐘。如果想排骨腍啲，可以再煮多15分鐘。

4. 將排骨撈起，另備炒鑊燒熱落油。先爆香魷魚鬚、蒜蓉及辣椒乾，然後落排骨及調味料炒至上色，再落100ml肉骨茶湯，煮至收汁再落埋蜜糖豆炒勻。最後喺鑊邊灒紹酒就可以上碟，亦可以轉落熱砂鍋上碟，記得剩番啲湯要落鹽調味喎。

【小貼士】

1. 肉骨茶湯包，唔同牌子唔同味道，有濃有淡。

2. 魷魚鬚最好買較白身及味道偏淡嘅，浸洗去除部份調味料，可避免過鹹。