聞西──梅菜滷肉刈包 啖啖芫茜 喜上眉梢

今期嘅主角刈包，亦有台式漢堡包之稱，用蒸熱嘅白色麵皮夾著滷肉而成，通常出沒於台灣夜市。刈包嘅「刈」字其實有割開嘅意思，聽講以前嘅刈包真係一個包，老闆要用刀切開個包再放餡料，後來才演變到而家上下分開好似個夾咁。咁個「刈」字究竟點讀呢？原來閩南話「刈」字發音為「掛」，所以叫「掛」包，或者叫「割」包都可以。

傳統嘅刈包主角當然係件半肥滷肉，配料有酸菜可以解油膩，仲有花生粉提香及增添口感，最後加埋大量芫茜咁就Perfect喇！宜家嘅刈包同漢煲包一樣有好多唔同嘅口味，咁啱近排有朋友送我來自匈牙利國寶級食材鬈毛豬梅肉扒，見啲油花分布均勻，就試吓用嚟整梅菜滷肉刈包，鬈毛豬果然肉味濃郁、肉質鬆軟，好啱識食又嘴刁嘅朋友仔。

原來鬈毛豬都大有來頭，佢係世界上唯一保留有鬈毛嘅豬種，營養價值豐富，包含鋅、銅、鐵及奧米加3脂肪酸等。勁還勁，原來1990年代鬈毛豬幾乎瀕臨絕種，當時只係剩番198隻，好彩匈牙利鬈毛豬保育協會聯同動物遺傳學家和農民嘅努力，依家數量已經大幅升番，如果有機會遇上，大家記得試吓喇。

就嚟聖誕，大家不妨試吓整刈包做party小食。我就買咗體型好的骰嘅「荷葉夾」，係台灣刈包嘅一半大。留意梅肉扒一定要有油花炆出嚟先唔會「乾、硬、嚡」，當然用五花腩都可以，其他配料就可以自由發揮啦。

材料：

梅肉扒或五花腩500g、梅菜乾40g、薑1小嚿、蔥2棵、蒜頭5粒、冰糖20g、八角2粒、芫茜及花生碎適量、荷葉夾1包

調味料：

生抽5湯匙、米酒3湯匙、胡椒粉1/4茶匙

做法：

1. 梅菜乾浸軟洗淨去沙後切碎，梅肉扒洗淨用廚紙印乾切件。另外準備滷肉配料：薑、蔥、蒜頭、冰糖及八角。

2. 燒熱鑊落少少油，放梅肉扒件煎至金黃盛起。然後用鑊內豬油爆香蔥、薑、蒜，並加入冰糖，將梅肉扒回鑊，同時加入八角炒勻。

3. 加入調味料，再加水份到材料表面，並放入梅菜乾，冚蓋慢火炆一個鐘直至收汁。最後落少少麻油添香味。

4. 芫茜用鹽水浸洗乾淨印乾及切碎，花生打碎或壓碎，同時蒸熱荷葉夾。之後，拎起荷葉夾，逐一放入梅肉扒件、梅菜、芫茜及花生碎。（我鍾意放大量梅菜乾，真係非常好味呀。）