聞西──蘿蔔臘鴨心靈湯 襯獅子山下獅子頭

最近消委會測試咗30款臘腸，發現其中6款檢出禁用染色料，而有8款產品喺描述中有出現個「瘦」字嘅結果，就全部屬於高脂，咁都得？另外8成測試臘腸都係「高糖」，係唔係覺得好得人驚呢？計我話，食得臘腸臘味就預咗「肥&唔太健康」，而且醃製產品本來就不宜多食，相信每年食幾次臘味煲仔飯應該唔算太過份。當然，記住千祈唔好隨街買來歷不明嘅臘味，更加唔好盡信廣告嘅語句，呢一方面我就信消委會多啲喇！

講到臘味我最鍾意就係臘鴨髀，最常食法：切件加薑絲、紹酒、糖，直接放飯面蒸或做煲仔飯餸料都得。記得臘鴨髀要出水，可以減低鹹度之餘，又可以除去表面嘅污糟嘢，其他臘味用水沖乾淨就可以。今次我會用臘鴨髀、蘿蔔及白菜，去做一個湯整配獅子頭。臘鴨本身好鹹，所以煲完湯嘅鴨肉都唔會無晒味，而且個湯完全唔需要調味，又香又濃鹹鮮味十足！配清淡嘅獅子頭好夾。

傳統獅子頭都係以四成瘦肉加六成肥肉製成，先有入口即溶嘅效果。其實，又唔一定要落咁多肥豬肉嘅，方法就係加入打出企身嘅蛋白，原理就係以空氣代替肥肉，就算用超市嘅免治豬肉整一樣咁嫩滑好食！

調味料：

蠔油..............2湯匙

粟粉..............1湯匙

糖..................1茶匙

胡椒粉.......1/4茶匙

水..................3湯匙

材料：

白蘿蔔............500g

臘鴨髀.............1隻

免治豬肉.........300g

白菜.................8棵

豆腐.................1件

水..................800ml

蛋白.................1隻

做法：

1. 白蘿蔔刨皮切大件，臘鴨髀洗乾淨斬件，再用滾水煮3分鐘撈起。白菜按大小切開二或開四，然後浸洗乾淨。

2. 水滾後落白蘿蔔、臘鴨髀及薑片，繼續煮至滾起。免治豬肉就加入調味料拌勻，蛋白加入1/4茶匙鹽打至企身，然後分兩次混入豬肉。注意唔好過份攪拌，只要撈勻就可以。

3. 用匙羹將豬肉做成肉丸狀，大小就隨個人喜好，然後輕輕放入湯裡（太大動作肉丸好容易散開），待肉丸定形後先至冚蓋，以慢火煮15分鐘。

4. 將啲浮沫搯走，加入白菜及豆腐件，最後冚蓋煮慢火15分鐘就完成。

【小貼士】

1. 白蘿蔔切得太細件，小心好易煮到又腍又散。

2. 買臘鴨髀要注意顏色，偏黃偏白嘅都唔好買，最好揀肉質紅潤而鴨皮又帶有光澤嘅。