聞西──鴛鴦炒飯 港式平衡讓人回味無窮

香港人向來鍾意北上行街食嘢，其實都唔係咩新鮮事，但近排又成為社會熱話。兩地物價的確有差異，我自己都親身體驗過，真係價錢好出品又有質素，重點係服務態度非常友善！咁我哋又唔需要妄自菲薄嘅，香港飲食文化對遊客都仲有好多吸引之處，雖然遊客宜家嘅旅遊習慣已經改變咗，唔一定要豪食，更多係想體驗香港嘅地道美食，咁就啱喇，今期介紹一款地道酒樓茶餐廳美食：鴛鴦炒飯。

所謂鴛鴦炒飯，即一碟飯有兩個汁，一邊係白汁蝦球，另一邊係茄汁雞絲，下面係蛋炒飯。話說以前婚宴單尾都會見到鴛鴦炒飯，鴛鴦象徵成雙成對、夫妻恩愛、忠貞不渝，又有陰陽和諧之意，喜慶日子當然要講意頭啦，不過由於製作需時，又難以預先預備，漸漸就被其他飯麵取代。

鴛鴦炒飯我唔鍾意撈埋嚟食，一定會食紅色嗰邊先，而且唔會破壞條紅白交界，又有朋友喜歡一口紅一口白咁食，話啲味道平衡啲喎！紅汁主要用蕃茄醬及喼汁調味，白汁就有兩種做法，有人會用花奶，亦有用蛋白，我覺得用蛋白味道清啲。呢個炒飯材料雖然普通，但充份顯示到香港中西合璧嘅飲食文化。

炒飯材料：

白飯................. 4碗

雞蛋................. 3隻

紅汁材料：

雞髀肉............. 150g

細洋蔥.............. 1個

蕃茄................. 2個

茄汁.............. 125ml

喼汁.............. 1 湯匙

糖.................. 1 湯匙

雞湯.............. 300ml

粟粉水…………..適量

白汁材料：

蝦仁................ 150g

青豆.................. 50g

蛋白..................3隻

雞湯.............. 300ml

麻油.............. 1 茶匙

粟粉水.............. 適量

做法：

1. 預備紅汁：雞髀肉去皮切成粗絲，落1 湯匙粟粉、1 湯匙油及1/4 茶匙胡椒粉撈勻略醃。蕃茄去籽後切條，洋蔥切絲。

2. 熱鑊落油先爆香洋蔥，再加入雞肉炒熟，然後落茄汁、喼汁、糖及雞湯。滾起後，煮約3 分鐘，落適量粟粉水調至合適濃稠，裝起保温。

3. 著手預備白汁。蝦仁開邊去腸，準備蛋白，先煮滾雞湯，之後落蝦仁及青豆煮3 分鐘，再邊撈邊加入蛋白。然後落麻油及適量粟粉水，調至合適濃稠，裝起保温。

4. 到準備炒飯階段。準備蛋漿，熱鑊落多少少油，倒入蛋漿炒至半熟，再加入白飯炒勻，放入深碟中，用錫紙摺成長條狀，將炒飯分隔兩邊整成S 形。最後分別鋪上紅汁、白汁，拎走錫紙條就完成。