聞西──太極老菜脯湯 「濃」的魅力沒法擋

每次去旅行我都會做定功課，除咗食買瞓之外，一定會上網睇吓當地有咩名產，除咗了解當地嘅飲食文化，有時候仲會啟發到好多新「煮」意！今期分享嘅太極老菜脯湯，就係用咗我喺汕頭買返嚟嘅老菜脯及後生菜脯。

可能大家從未聽聞過老菜脯呢樣食材。其實，老菜脯喺潮汕飲食文化佔有好重要嘅地位，佢同鹹菜、魚露有「潮州三寶」之稱！菜脯就係醃蘿蔔（大家應該食個菜脯蛋吧），一般嘅菜脯大概醃製一個月就食得。如果將後生菜脯放入甕，經過十五、二十、甚至三十年封存醃製，就會修成正果，變成黑蚊蚊嘅老菜脯喇。潮汕人鍾意用老菜脯煮湯，除咗係一味好家常嘅湯水外，其實佢仲好有藥膳價值，好似對治理感冒、腸胃唔舒服都好有效果。記住老菜脯越老越好，下次有機會去潮汕就唔好錯過喇！

老菜脯氣味非常濃烈，有啲似醬油嘅鹹香味，又帶啲中藥材嘅味道，咁鮮明突出嘅味道最適合用嚟煮湯，配雞配肉都咁適合。今次用咗一黑一白、一老一嫩太極配，烏雞配白色嘅大和芋，大和芋係日本鮮淮山嘅一種，口感好似芋頭，味道鮮甜，而且低卡高纖好有益。當然，唔少得主角老菜脯，我仲加埋青春菜脯，成個湯嘅鹹鮮味更加突出，如果無老菜脯，淨係菜脯、肉片、鮮淮山滾個湯都已經非常好味！

材料：

細隻烏雞1隻..........約800g

大和芋.........................400g

老菜脯半條................約30g

後生菜脯........................50g

杞子...............................15g

薑...................................5片

芫荽..............................一棵（純粹個人喜好，可以唔加）

水.............................1500ml

做法：

1. 烏雞斬件後出水5分鐘，將血水及雜質迫出嚟之後再洗乾淨，煲出嚟嘅湯就會冇咁濁。

2. 戴手套幫大和芋去皮切件，因為大和芋有好多滑滑嘅黏液，唔想手痕就一定要帶手套。另外，將老菜脯切片，並浸軟啲杞子。

3. 水加薑片煲滾。順次序落烏雞、老菜脯、後生菜脯、大和芋。冚蓋滾起計，轉慢火煮半個鐘。

4. 落杞子煲多3分鐘就完成，然後請試味。老菜脯及後生菜脯本身有鹹味，所以加少少鹽調味就可以。