(荃灣葵青離島)演奏陶瓷樂器 促進共融 更添勇氣

本地獨立樂隊The Hertz近日與聖雅各福群會「藝想」合作，為跨界藝術計劃「陶瓷啪瓷MusiCLAY」創作主題曲《我想》。早前，他們在南豐紗廠舉行的「音樂陶瓷日」壓軸登場，並與復康人士「師傅仔」首次同台演出，為活動畫上難忘的一筆。

無論師傅仔定係我哋，都唔易了解自己。首歌想畀大家一種「我有能力做到」嘅勇氣。

當談到如何把陶瓷樂器融入創作時，主音Herman坦言樂隊曾猶豫過：「我哋未試過用陶瓷樂器做音樂，但樂隊一向鍾意嘗試新嘢，加上『藝想』背後嘅故事好值得支持，最後好快就答應合作。」歌曲一開場便傳來清脆的陶片琴聲，但背後製作並不輕鬆。「陶瓷樂器好重，我哋帶唔到返studio，最後乾脆走去『藝想』工作室錄音，仲拍埋片記錄整個過程。」

陶藝與音樂交錯成一日限定的「音樂陶瓷日」。

//睇落好簡單，但自己整就歪歪斜斜，原來一啲都唔容易。//

結他手Ricky說：「陶瓷樂器嘅聲音好難控制，每塊陶片嘅顏料、厚度、燒製時間同溫度都會影響音調。我哋每人親手整咗一塊，發現同機製樂器好唔同，反而更好玩、更貼地。」

Ricky記得第一次踏進「藝想」上陶藝班：「睇落好簡單，但自己整就歪歪斜斜，原來一啲都唔容易。」琴手Him也被他們的創作方式觸動：「我哋問師傅仔點解咁做佢哋啲作品，佢哋會話『冇特別諗，想到就做』。呢種純粹對我哋好大衝擊，因為我哋創作時好多時諗太多」。

《我想》既是寫給「師傅仔」，也是寫給每一個正在摸索自己的人。Him說：「好難話完全表達師傅仔心聲，但我哋有諗到佢哋同家人嘅感受。其實無論師傅仔定係我哋，都唔易了解自己真正想成為咩人。首歌想畀大家一種『我有能力做到』嘅勇氣。」歌詞裡那句「想被人捉緊」正正希望聽者感受到自己的價值。

The Hertz 與「師傅仔」，用陶瓷與音符拼貼出最純粹的創作火花。

//佢哋對音樂嘅熱誠真係令我哋好respect！//

談到首次合作演出，Herman笑言：「呢首歌係為師傅仔而寫，能夠一齊表演好有意義。佢哋好勤力練習，可能比我哋更熟首歌，佢哋對音樂嘅熱誠真係令我哋好respect！」

對Ricky而言，音樂與陶藝其實同樣是創作：「師傅仔整陶藝有自己風格，就好似我哋做音樂，都希望人一聽就知係The Hertz。」Herman更直言：「師傅仔純粹『想做就做』嘅態度好難得，全世界做藝術嘅人，都好少可以完全零考量咁出發。」Him尤其深受啟發：「音樂界有時會有種精英主義，但師傅仔證明只要由衷去做，任何人都可以整出好作品。」

在南豐紗廠舉行的「音樂陶瓷日」。

【我講我想】

首要睇重自己 帶歡樂入社區

新歌《我想》已上架串流平台。Herman說這次嘗試了不同於以往的簡約風格：「旋律簡單易入口，一來希望師傅仔聽得明、唱得到，二來想大家知道香港有班咁樣嘅人，雖然喺常人眼中可能『唔同』，但佢哋反而啟發咗我哋，形成雙向支持。想提醒聽眾唔需要羨慕其他人，因為可能人哋都好羨慕緊你，最重要係睇重自己。」

踏上「音樂陶瓷日」的舞台前，TheHertz只想把歡樂帶入社區：「希望多啲人認識藝術、陶瓷同師傅仔，聽到首歌，一齊玩一日，我哋已經好開心。」