扭波大叔派氣球 博童一笑定想博懵？

不少家長假日會帶年幼子女到公園放電。有家長在網上報料指，一名「扭波大叔」近期活躍於啟德區內公園，他會免費為小孩扭送氣球，甚受小童以至家長歡迎。有家長聲稱該男子活躍全港，曾目睹該男子借此方法親近女童，目的是要女童「坐佢大髀」。惟此說法引起熱議，有人認為是「小人之心」，有人則相信男子可疑，著家長防範。

「扭波大叔」近期常現身啟德大草地。

不只小童，家長也上前討氣球。

年約逾40歲常現啟德 「特別鍾意同細路女玩」

啟德AIRSIDE商場對開大草地，每逢假日熱鬧非常。草地附近除了有商場亦有免費遊樂場，不少主人亦會帶同寵物到草地遊玩，又有不少小孩在該處玩耍。報料的家長指，「扭波大叔」於2025年1月12日亦現身該草地。

該男子年約逾40歲，他帶同一張露營椅及買餸手拉車坐在公園，然後拿出氣球及充氣工具，再扭成不同造型送給孩子。該名家長透露，在啟德區內曾多次碰見他，除該草地外亦會在啟晴遊樂場、以至啟德一號對開的公園出現。她懷疑該男子動機不純，借機親近女童：「家長要小心啲，有好多細路圍住佢，佢會特別鍾意同細路女玩，有次係公園親眼見到佢叫個妹妹仔錫佢，仲問你媽媽呢？」

其他遊樂場亦見該中年漢蹤影。

報料說法惹群組熱議 有人稱沒錯有指過火

《我家》記者於1月19日巡視大草地及附近的遊樂場，現場有不少兒童正在遊玩，惟未見「扭波大叔」出現。而報料家長的說法仍惹起家長群的熱議，有人認為他「只是用自己擅長嘅嘢帶畀小朋友歡樂」，並相信該男子只是單純送氣球給孩子並無做錯，沒有其借意接近女童的證據就不應胡亂指控別人，亦不應該對他存有敵意，直言「如果真係唔放心就自己睇緊啲」。

惟有人則聲稱該男子活躍於全港公園多年，親身見過其「過火」行為：「目睹佢叫個妹妹坐佢大脾」、「葵芳新都會都有出現，會乘機攬住啲女仔，家長們真係要小心唔好畀小朋友同佢玩」，有人更聲稱該男子曾叫事主女兒親吻他，著其他家長小心。有人更直言曾報警，但始終因為無證據只能「放虎歸山」。

家長對大叔送贈氣球及小童反應兩極。（互聯網圖）

【家長點睇？】

撐扭波大叔帶來歡樂 Vs 指控扭波大叔動機不純

撐扭波大叔

大家可以提點下佢，始終每個人都唔係所有嘢都可以考慮到、顧慮到！作為一個媽媽都明白有提防心其實係好嘅，不過真係希望大家唔好對佢有惡意。

佢喺荃灣西都出現過，但就無你講嘅情況喎，見過兩三次，有兩次都有兩三個姨姨係佢隔離學緊扭波一齊派俾小朋友，男女都會派，我見佢好齊裝備，以為係義工團。

指控扭波大叔

喺啟晴飛機公園見過佢，又係用氣球嚟吸引小朋友聚集，有時好刻意咁淨係同女仔玩，男仔佢忽略。又會用氣球嚟掃女孩子嘅胸部、撩起條裙！

幾年前喺九龍城廣場對出公園見過，又攬又叫啲細路錫佢，係咁放啲長汽球飛上天，啲女仔執咗，佢就攬。

【專家有話說】

教孩童身體自主 遇危險大聲呼救

早前本港發生不少猥褻女童案引起社會關注，兒童被侵犯更可能留下陰影。最近一宗發生於2024年10月，屯門一名39歲男子涉嫌於青山兒童遊樂場，非禮一名6歲女童，有市民發現後大聲喝止，最終男子被多名街坊制服及報案。

家福會家庭服務高級經理駱慧芳向《我家》表示，孩子長大和外界接觸的機會愈多，會碰到的危險也就愈多。因此，必須培養出孩子對環境裏危險情況的應變能力。父母亦需要幫助孩子建立身體自主權的觀念，也就是讓他們知道自己是身體的主人，其他人不能隨意觸碰亂摸。

駱慧芳建議家長盡早培養孩子應對危險能力。

駱慧芳續指，當孩子遇到危險時，家長可教小朋友要先保持冷靜，態度強硬，向他人大聲叫嚷呼救，並必須要「通知大人」，一旦同行家長發現有問題，便要上前制止，並存證報警求助。

屯門男子去年10月涉嫌非禮一女童，被家長制服報警。