(沙田)愛護腦退化者 有家中心變做家

人年紀大，機器壞，「記性」亦越來越差，更有老友記患上被稱為不可逆轉的腦退化症。現今醫學雖然未能治癒，卻可盡早發現、進行延緩治療。賽馬會耆智園是香港首間以腦退化症為重點治療、照顧的「零約束」中心園舍，在醫護用心服務下洋溢溫情。園長梁曙曦說﹕「我哋就係唔想畀人一種呢度係老人中心，就係希望有家嘅感覺。」

梁曙曦：「希望耆智園畀人有家嘅感覺。」

耆智園內的環境、服務、活動設計等，都以配合腦退化症人士治療為首要目的，例如柔和的燈光，木質傢俱、穿透力強的玻璃門等。「呢啲設計提高採光度，又有助營造溫馨，有在屋企舒適放鬆嘅感覺」，「屋企係唔會有好似安全衣、約束手套呢啲物品，所以我哋呢度都唔會有。」

「藥會打沉一個人」，耆智園使用平衡藥物和非藥物的混合治療模式，針對腦退化症人士的症狀，設計不同鍛煉記憶、認知、部分行為能力等活動。「藥物控制情緒或者情緒引伸嘅行為，有好大穩定作用，但始終存在藥性。」中心藉音樂香薰等活動或藝術去穩定患者情緒，並提升能力。「曾有園友情緒暴躁、『粗口成文』。經香薰治療師按摩，成個人平靜晒、好放鬆，瞓到連副假牙跌埋出嚟。」

房間光線充足，空氣流通。

腦退化症影響患者多方能力

日間中心有位園友，平日少站少走。「呢位園友令我咁記得，因雖然有工人姐姐照顧，但姐姐原來唔係照顧得唔好，」直到中心同事發覺園友傳出異味，才感妥。「同事幫助下，發現原來園友喺尾龍骨對上，生咗有手掌咁大嘅『壓瘡』，附近更加係滴緊一啲液體。問過姐姐，佢知道有呢個傷口，但可能欠缺照顧的知識，唔知點處理。」腦退化症影響患者多方能力，如語言表達、認知理解、行動能力等均受影響。工人姐姐日常未能接收園友「不適」的訊號，便沒有向其他人求助。

梁曙曦（右）與同事林詠妮，皆為「友里蹤跡」社區計劃骨幹成員。

照顧者須行多一步問多一句

梁園長指，有園友因長期坐下生壓瘡。該園友後來轉介到醫院切除壞死、變成腐肉的組織後，才得知傷口約有一個蘋果般深。「病情限制咗園友嘅表達能力，佢唔識講﹕『我痛呀』、『我邊度邊度唔舒服』，就變咗姐姐唔知，屋企人唔知。如此情況，好需要照顧者行多一步、去問多一句。」溝通表達上，腦退化者只可透過一、兩個單詞表達，所以照顧者需要代入他們的角度，或透過日常生活一些細微的變化去察覺真正的需要。

園友活動範圍，舒適安全並重。

【一站式服務 協助及早治療】

耆智園提供全面服務，由及早介入、醫生診斷、照顧、諮詢、「回家易」復康計劃等等服務，減省腦退化者家人奔波勞碌。「我哋有熱線服務，為腦退化症人士家庭解答疑難，如：『爸爸/媽媽唔係好畀到反應，我可以點幫，或者照顧佢？』我哋希望幫得幾多得幾多。」

中心裡的記憶診所，綜合四科不同的專科醫生﹕老人科、普通科、精神科及腦神經科，方便求診者及早治療。「好多人都唔知自己有腦退化症，到咗求診已經係好嚴重嘅時期。」

病向淺中醫，任何病越早治療越有幫助，腦退化症亦不例外。「好似唔行路一個星期，手腳已冇咁協調，甚至可能周身骨痛。」梁園長說，當見到部分園友由生活未能自理，到可自行「揀飲擇食」的地步，就感到很欣慰。

為讓公眾了解腦退化症，耆智園常到各區進行教育工作。