(沙田)伙頭有團火 疫境開食坊

火炭陸悅坊的創辦人革哥，雖然年少時已綴學，猶幸努力不懈，為自己創造機會大展拳腳，終在飲食界衝出名堂。革哥曾在大型連鎖集團旗下的菜館擔任總廚，去年更成立食坊，決意繼續闖蕩中菜江湖！

革哥：「疫情改變好多人飲食習慣，我哋都要改變。」

革哥少年時從福建來港定居，15歲任點心師傅，曾於星光行北京樓、香格里拉酒店等表演手拉麵。他說，曾被問到能否以拉麵跳繩，現在回想依然忍俊不禁﹕「以前有個廣告，個拉麵師傅用拉緊嘅麵嚟跳繩，嗰陣好興，但其實點得吖，頂多一兩下。」革哥默默耕耘，後來晉升為大型飲食集團總廚，就這樣在飲食業一做就是二十年。

我之前唔駛自己盛飯，直到開舖，乜都自己做。

直到去年經朋友介紹，革哥得知現時的鋪位待租，便決定跳出舒適圈，於火炭開設食坊。

麻雀雖小，五臟俱全，以京菜夾雜台灣菜為主，有招牌菜如酸菜魚、鹽酥雞等。革哥回顧昔日在酒樓任大廚時，享有「皇帝般」的照顧，「我之前一向唔駛自己盛飯，直到自己開舖頭，我乜都要自己做，洗碗、入貨、管數、請人，數唔完嘅工作，比以前更加辛苦。」

陸悅坊迎合港人對台式飲品的喜愛，設置特色茶舍。

香口類菜式受歡迎。

應對疫情親自踩單車送外賣

開業適逢社會運動，革哥說：「原本預計會好快過去，而且對我哋唔算太大影響。點知疫情就跟住嚟，不過托賴宜家都有番起息。」

為應對疫情，陸悅坊亦開設外送服務，更加由革哥親自踩單車送外賣，「疫情都改變咗好多人嘅飲食習慣，我哋都要改變。」

火炭區內有不少地盤和工廠，顧客多屬營營役役勞工一族，「為咗令客人食完飯，繼續有氣有力返工，我哋嘅嘢食都為佢哋提供足夠嘅份量。」革哥補充說。

京菜夾雜台灣菜為主，色、香、味俱全

有得有失，少咗陪屋企人。

即使經歷疫情令飲食業進入寒冬，革哥仍以樂觀心態面對﹕「可以話有得又有失，失嘅可能係陪伴屋企人嘅時間喇。以往仲做緊點心嗰陣，就成日有時間煮俾屋企人食，放假都煮。得嘅呢，就係難能可貴嘅經歷同體驗。」營運一間餐廳，自身的經驗、知識等只是其中一部分，「更多嘅係對應技巧，因為位處嘅地區唔同，經營嘅手法都會唔同。」他指自己還在摸索當中，依然需要不斷學習。

顧及勞動一族，份量偏大偏多。

【創作帶來滿足 搵貨識咗手足】

「做廚嗰陣嘅滿足感同成功感，除咗嚟自見到客人清晒啲菜式，仲嚟自成功創作出每一道新菜式。」食坊雖有招牌菜，革哥私下並沒有偏愛的菜式，「我自己都係鍾意試新嘢多，但如果平時淨係自己、屋企人食都係簡單為主，只係煮自己想食或者想試嘅嘢。」

因為自己也對食材感興趣，閒時亦會親自採購，當中更認識到一群志同道合的朋友。「以前只係困喺酒樓，唔駛點出去、唔駛自己落手落腳做，依家流浮山嘅海鮮檔，都變成老友！佢哋有咩靚貨都即刻通知我。」

革哥在流浮山有唔少老友。

在家下廚簡單為主。