寵物炎夏在家有「毛畀」煩惱？

夏日炎炎，有不少主人都會帶毛孩外出玩耍。除帶去狗公園外，亦會衝出市區，去沙灘游水降溫。主人帶寵物到戶外，以至出門入門都處於戒備狀態，十分警覺，但就往往忽略在家須多加留意之處！

冷氣涼浸浸 注意勿冷親

夏天咁熱，在家開住冷氣先舒服。長開冷氣，毛孩的確會涼爽、舒服一啲，但亦有唔少隱憂。喺屋企，冷氣可以維持大約攝氏25至26度。主人要不時留意毛孩嘅體溫，同鼻尖嘅濕潤程度，免得冷親都唔知。

如果毛孩剷短左毛，就畀張薄薄嘅被仔佢哋，維持番個體溫。

一般毛孩體溫比人類偏高少少﹕狗狗大約為攝氏37.5至39度﹔貓貓大約為攝氏38.5至39.5度。如果摸落發現佢哋體溫偏高、休息位置又咁啱對正風口位，就要快啲做番保暖措施喇﹗

冇開冷氣的話，就要持續為毛孩提供乾淨飲用水，亦可以自製小冰球予毛孩降溫。當然，主人亦可以用涼感墊、濕毛巾等代替普通床仔，毛孩攤係上面幫助散熱之外都可以涼浸浸﹗另外，臨離開屋企之前可以盡量開窗，令空氣流通，窗簾亦可用上，避免太陽曬入屋內令室內溫度上升。

留意床仔擺放位置，最好遠離冷氣出風位，免得毛孩吹親。

定時洗白白 皮膚健康爽

香港夏天天氣悶熱，加上如果屋企空氣不流通，就有可能罨住罨住，容易引起皮膚問題。特別狗狗嘅皮脂腺，會分泌油脂去保護皮膚，但當油脂長期接觸到潮濕溫暖環境，就會開始滋生細菌並累積起來。所以無論毛孩落街與否，不時梳理毛髮、沖涼都係一個好習慣。

沖涼可為毛孩降溫，保持皮膚乾爽。

要注意嘅係，狗狗皮膚構造比人類薄得多，如果過度清洗，將破壞皮膚組織。所以日常同寵物沖涼前，可以透過梳通打結嘅毛髮，檢查毛孩嘅皮膚狀況。

如果主人未有替毛孩剪短毛髮，就需要加倍留意室內嘅空氣流通、乾爽，避免屋企成為滋生過敏源嘅溫床，引起毛孩皮膚問題。

撥開啲毛，然後逐層梳呀！