陳洛志──健一健脾 唔見飲水肥

成日聽身邊女性呻「點解飲水都會肥」？唔少人「輪迴」於減肥與反彈，明明食得唔多，但就減極減唔到，似乎飲啖水都會肥。

其實，只要辨清個人體質並對症下藥，就可擺脫「水腫體質」。芸芸易胖嘅體質中，「脾腎痰濕型」最為常見。平時鍾意食生冷嘢、飲凍飲，又缺乏運動，造成脾胃功能失常，令身體入面嘅水分難於排出，久而久之就形成「痰濕」及水腫。濕氣傷脾胃，脂肪更容易堆積係體內，搞到「飲水都會肥」。

而虛胖人通常係「痰濕體質」，雖然食量唔大，但因為脾胃功能失調，水份積存體內形成水腫。

【痰濕體質特徵】
肌肉鬆軟、下半身偏肥
面色浮腫偏白、容易疲倦
手腳冰冷腫脹
小便色較淡、大便易稀爛

要改善體內「痰濕」，建議飲「健脾茶」以助水分代謝，改善下肢水腫。製作簡單，用以下材料，泡熱水5-10分鐘即可：
一杯茶KO水腫
茯苓1.5錢、澤瀉1.5錢、荷葉1錢、桂枝0.5錢