膠樽重生！變身六大法寶

天氣炎熱，有時就會買支樽裝飲品來消一下暑，久而久之屋企就愈堆愈多的膠樽。當然，我們可以拎去回收。不過，只要加少少創意同心思，樽膠其實尚有好多用途。以下的膠樽重生方法，不但超級簡單，更能為你帶來更方便的生活，大家不妨DIY，讓膠樽變得更有意義！

1. 密封防潮神蓋
糖鹽等的調味料，以及薯片零食的包裝大多為袋裝，打開之後難以密封，容易受潮變質，但只要動下腦筋，膠樽都可以解決問題！

首先將膠樽洗乾淨，再用鎅刀把膠樽頂部割下來，但要注意割口位的披鋒。扭開樽蓋，將包裝食品的膠袋開封位置，穿過樽口位，並反出來。用樽蓋樽口位置連同膠袋開封位置扭實，就可以妥善地把食品封好！平時用開衫夾同鐵夾的朋友，不妨試試！

2. 吸蛋黃神器
煮飯時，有時要將蛋黃同蛋白分開煮。一般都會將蛋黃同蛋白來回倒入兩邊雞蛋殼內，把多餘的蛋白倒走。然而，原來只要一個膠樽，就可以又快又容易將蛋黃同蛋白分開。

先將雞蛋打入碗內，擰開膠樽蓋後，輕輕壓住膠樽。然後，把膠樽對準蛋黃，慢慢放鬆手。蛋黃就會因為氣壓而吸入膠樽內，最後把蛋黃輕輕擠壓出來至另一個碗便可，簡單完成分離任務！

3. 慳位食物樽
準備兩個膠樽，將兩個膠樽對半剪開。先把意粉、蔬菜或切段洋葱存放在其中一個膠樽內，在另一邊蓋上膠樽，就可以成功把食物存放起來，慳位又易用！

4. 迷你儲物盒
要預備帶有長樽頸的膠樽，用鎅刀切開。切開後，要把披鋒用較剪修平，讓樽蓋可以套上切口。如果太鬆的話，可以用搥仔揼緊。最後，在另一邊扭上另一個樽蓋，就變成了迷你儲物盒，可以放小飾品、藥丸、粉底等等，好適合旅行出外攜帶！

5. 緊急用匙羹
去露營的朋友，可能都遇過忘帶食具的尷尬境況，其實只要有個膠樽，可能就挽救到這個困局！

準備一個底部有波浪狀的膠樽，先用鎅刀把上半部份裁去，保留下半部。用剪刀在膠樽下半部份剪出匙羹形狀的膠片。剪出後，匙羹會帶有披鋒，用打火機在匙羹的周邊輕灼，並迅速用手指把受熱變軟的塑膠披鋒向內捏。最後，就在匙柄的中間部份，用力壓摺出一條呈V狀的長坑，匙柄就會夠硬身！

6. 超簡約盆栽
先把膠樽切開一半，再在近樽蓋大約3吋位置打三個小孔。在樽蓋中間打一個細洞並串上約2吋長的綿線。將膠樽上半部份倒轉加上土壤及種子，放在已加入三分一清水的下半部份，綿線會以毛細管原理自動吸水滋潤泥土，可以減少淋水次數，慳時間又方便，滿滿簡約風！