舊雨遮唔好掉 教你DIY變做實用品

落雨天，自然要用雨遮，但大家總會在家中搵出幾把廢舊的雨遮，又不能用，二手放賣又唔值錢，好多人就索性直接扔掉入垃圾桶。其實破舊的雨遮都有自身的價值，只要大家動動腦筋，將屋企無用的雨遮稍微改動一下，都可以變得好實用!

【快手做個簡單索袋】

材料及工具
舊雨遮一把、長繩、剪刀

做法
1. 用剪刀或刀片將遮布同遮骨分離，小心剪掉繩線，勿整爛遮布。遮布同骨架的連結部分剪斷後，就可以輕鬆分離。

2. 遮頂連接住的是卡榫或者螺牙，可以用相應的方法將遮頂的連接位分開。

3. 拆出遮布後，在每個角位大約2cm剪一個細孔，細孔的大小不用太大，可以穿過長繩就可以。

4. 準備好長繩後，用一上一下的方式穿入細孔。如果繩不夠長，可以將兩條繩綁起來加長。

5. 穿到最後一個孔後，將兩個繩頭打結固定好。

6. 完成後，遮布就會形成一個袋狀。

7. 只要將繩輕輕一拉，就即刻變成一個環保袋，可以重用又防到水。

【加啲心思遮布變圍裙】

材料及工具
舊雨遮一把、包邊條、針及縫線、剪刀

做法
1. 拆出來後，大家會見到完整的傘布是用八片或更多片的三角形防水布組合而成。

2. 把傘布由中間裁開成8個等腰三角形。

3. 取出4張三角形防水布，擺成下圖。

4. 裁去多餘的部份，基本已經可以看到圍裙的雛形。

5. 將各部分用針線縫合起來後，用自己喜歡的顏色包邊條做一下修飾，同樣用針線將包邊條縫上圍裙邊。

6. 做好的圍裙可以防到水，入得廚房唔怕濕!

【拆遮小貼士】
拆時留意縫線
熨平遮布更好

拆舊遮的確花時間，但只要畀啲耐性，同掌握以下小技巧，就可以拆得有效率!先留意一下舊遮的縫紉規律，有些雨遮的縫線可以一拆到底，拆落來的傘布就好似一個個三角形，但兩邊並不是直線，稍微有啲鼓脹。所以，有時間的話，不妨熨平一下遮布，拼接出來的布先夠平。

舊遮回收有辦法

大家平時可能少留意舊遮原來都有得回收，不妨下次將屋企的舊遮拎去呢個地方改造重生!

聖雅各福群會賽馬會升級再造中心

再造中心鼓勵公司及機構捐贈棄置或剩餘物料，再經由本地年輕設計師重新改造，善加運用物件的特質。疫情之前，中心會舉辦的導賞團、教育工作坊和展覽，公眾可以參加活動，見證一件升級再造產品由概念設計、物料選材、生產製作到推廣發售的誕生過程。

地址：灣仔石水渠街85號聖雅各福群會總會大樓六樓
電話：25962756

一掃看詳情!