簡易級親子郊遊路線 將軍澳探小夏威夷徑

抗疫多時，隨著住政府放寬社交距離措施，一家人開始走出屋企，到郊野公園抖抖氣。不過，近日每每去到郊遊勝地，都有可能遇上人山人海嘅場面。其實，想喺市區嘅行山徑欣賞自然美景，又唔駛跑到太遠。我哋就帶大家去位於將軍澳嘅小夏威夷徑睇瀑布，又唔駛花好多時間！

1. 由井欄樹出發行落山舒服啲

想行小夏威夷徑行得輕鬆一啲，可以選擇在井欄樹作為起點行去寶琳，絕大部分路段以落山為主。喺井欄樹巴士站落車之後，過行人隧道，就會見到前往澳頭村嘅指示牌，我哋就沿路進入。在正式走入小夏威夷徑前，大家可以留意一下一條曾經用來作引水道嘅小橋，家長可以讓小朋友估下條橋用途，增進一下知識。

在分坌路靠左，留意指示牌，稍後就正式進入小夏威夷徑。

2. 小峽谷映入眼簾鄉郊氣息濃

進入小夏威夷徑之後，目光好快就畀一大片草原吸引，行多兩步有一個小峽谷映入眼簾，由遠至近綠油油一片，風景十分怡人。據說上世紀初有商人喺附近經營麵粉廠，麵粉廠倒閉後，村民就將廢棄嘅儲水池改成小夏威夷游泳場，亦係小徑名稱由來。我哋就建議一家人盡量放慢腳步，邊行邊欣賞哩個寧靜嘅自然美景，暫時忘卻抗疫嘅緊張思緒！

3. 考考大家眼力搵出水壩遺蹟

沿住石砌嘅步道走入樹林，不時聽到流水聲。原來當年為建造麵粉廠，商人在河道嘅上游興建至少三條水壩，將河道嘅水截入儲水池。現在除咗最下游嘅一條外，其餘兩條都已經被破壞或炸毀。家長不妨同子女邊行邊搵，睇吓搵唔搵到所有水壩遺蹟！

4. 水壩小瀑布打卡勿落水嬉戲
最下游嘅水壩尚算完整，水流由中間嘅缺口一瀉而下，形成一個小瀑布。經常有人喺埋個水壩上打卡，大家亦都可以由林中崎嶇小道走落去，正面拍攝小瀑布嘅全貌，但要注意安全。小瀑布下面有一條小溪澗，有好多家長都會帶住小朋友來玩水，但是「欺山莫欺水」，我哋就不建議落水，以免發生意外。

5. 林中小道而下賞將軍澳樓景

經過河溪小橋後，大家要細心留意石道旁邊嘅一條崎嶇小道，沿道而下，就會見到多塊巨石。放眼一看，可以遠眺將軍澳嘅樓景。寬闊巨石足以容納二三人，加上流水淙淙，整體氣氛甚具詩意。但是大家要小心水深石滑，家長若帶住小朋友的話，都係從岸觀賞，切勿爬上巨石。

6. 旅程尾聲蓮苑臺瀑布大合照

離開巨石再向下行大約15分鐘，就會到十字路口。向右轉，沿澳頭方向行約10分鐘，就到達蓮苑臺瀑布。瀑布層層遞上，流水沖擊大石嘅聲音巨大，好多人都會在厘度自拍或影大合照，一家大小亦可以坐喺岸邊欣賞變化萬千嘅流水景色。之後原路折返到十字路口，往將軍澳村方向落樓梯，一家大細就離開小夏威夷徑回到市區喇！

從石道旁邊嘅崎嶇小道而下，你會發現視野豁然開闊。

【簡單資訊】
路線長度
約2.9公里(井欄樹至寶琳北路)
約3.8公里(井欄樹至寶琳地鐵站)

行程時間
約1.5小時

起點交通
巴士路線91、91M、92、96R、689R等
小巴路線1、1A、11、104等

終點交通
寶琳地鐵站，巴士路線93A、93K、93M、98A、98C、296M、690、692等