籃球培訓 幫孩童擴闊社交圈

「創義」籃球培訓計劃，由生命樂章慈善基金主辦，透過音樂與運動推廣籃球訓練，為基層家庭（包括基層、劏房、單親家庭）小朋友提供參與運動興趣班的機會，從中致力培養小朋友對籃球興趣，繼而培育新一代籃球員。

計劃起始人之一的Oscar亦身兼計劃的籃球教練，曾參與石籬的社區外展工作。機緣下，他認識到生命樂章的社工Amy，「Amy本身為基層兒童提供音樂活動，我哋同樣希望為區內嘅小朋友，特別係基層家庭嘅小朋友，提供更多接觸社區嘅機會。」由於志同道合，兩人將籃球運動與音樂結合，創立出「創義」。

籃球教練Oscar 曾參與社區外展工作。

甲組籃球員回饋社會

即使現階段未能為培訓加入音樂元素，但曾打入本地甲組籃球賽事的Oscar指，打籃球對小朋友的身心發展有莫大好處：「籃球係全身鍛煉嘅帶氧運動，唔只可幫小朋友增強心肺功能，亦可以鍛煉同強化肌肉、筋骨。」尤其疫情飄忽，為小朋友打造強健體魄特別重要。「另外，籃球需要團隊合作，小朋友同隊友或組員溝通時建立友誼、訓練社交技巧同時擴闊社交圈子。」

然而，「創義」最終目的不僅如此：「『創』業行『義』，想呢個計劃培養年輕人成為義工，培養幫助弱小、行俠仗義嘅精神，或提供少量就業機會，令佢哋幫人同時幫到自己，搵到目標同人生意義。」

團隊訓練令小朋友學會協調分工。

「小朋友有得玩就開心」

現時，除了Oscar擔任教練外，亦有兩位來自玄圓一中的畢業生擔任助教。「無論係嚟幫手嘅年輕人，定係參加計劃嘅小朋友，都希望佢哋可以從中搵到屬於自己嘅存在、人生意義。」

今年暑假正式開始的「創義」，面對場地不足及疫情威脅，依然得到正面迴響。「我哋原計劃預約到室內運動場館，始終香港夏天天氣悶熱，又唔穩定；奈何好多地方都預約唔到，唯有轉移上堂嘅地方出室外。」Oscar慶幸小朋友的反應同樣熱烈，笑說：「小朋友有得玩就開心，但家長就慘啲，好似做桑拿咁坐喺度等，不過佢哋見到小朋友玩得開心都好支持。」

見小朋友玩得開心，一眾家長都好支持。

【球場尋覓意義 球賽發光發熱】

同時，由Oscar領軍的「創義C隊」在一年多前成立，而計劃中的兩位助教亦身處其中。剛過去的7月底，他們在「同珍回歸盃葵青3人籃球賽」奪得殿軍。「喺疫情之中，咁難去訓練嘅情況下，佢哋都可以喺十六支隊伍入面可以攞到殿軍，真係好值得鼓舞。」

Oscar希望他們繼續在球場上發光發熱，不斷追尋人生上的意義﹕「我哋希望最終可以以運動創造人生意義，以生命影響生命。」

展望未來，Oscar希望可以將運動與音樂結合並應用在培訓計劃裡，使基層兒童及其家庭擁有更多機會，發揮潛能，同時感受到自身一樣可以回饋社會的價值。

體能訓練雖然辛苦，但有助小朋友強化肌肉。