工場支援自閉者 星星兒製月餅見驕陽

位於葵興的星星堂於2017年底成立，為社會企業「安其兒」的食物工場，以製曲奇、小型西餅、蛋糕為主。工場旨在推廣健康美食的同時，協助自閉人士及特殊學習需要青年就業，使其融入社會、發揮所長，共同建構和諧、關愛的社會。

「始終主流學校對自閉症學童嘅認識，或者支援唔係好多。」創辦人阿Jo與拍檔，自兒女在小學階段，因義工活動而認識。「見香港近年越來越多自閉人士及特殊學習需要患者，佢哋就業困難嘅問題，一直係身為父母最大嘅憂慮。」由於自閉人士需要長期培訓、熟習，在利益掛帥的社會，商業公司難以投放資源訓練。

阿Jo 仔仔現時亦在星星堂幫忙。

二人均擔心孩子將來在職場難獲訓練和包容：「與其要佢哋出去謀一份工，不如我自己開公司，我請番我個仔。」自閉人士的適應和學習能力較一般人遜色，星星堂針對性的就業訓練，更能有效幫助自閉人士及特殊學習需要青年，去熟識職場運作及模式。「人哋可能一兩個星期就學到嘅野，佢哋可能要一個月，甚至更長嘅時間。」

星星堂近月出品無添加劑蔬菜麵， 收集賣剩蔬菜搾汁與麵粉混合製成。

是家也是學堂社工持續跟進

星星堂，是星星兒的學堂。阿Jo說：「自閉人士被稱為『外星嘅孩子』，希望星星堂可以作為佢哋嘅橋樑，連接學校與社會。」大型職訓機構雖然有開設職場訓練班，予特殊需要人士，但阿Jo有感欠缺後續支援﹕「好多時，當計劃同實習期一完，冇受聘嘅受訓者返去原本嘅中心，就未必會再有人幫佢哋搵工。」而他們則會與每個家庭保持聯絡，又與負責社工溝通，務求持續跟進。

學員幫忙準備材料和包裝，員工負責搓形、倒模，互相配合。

「試過有啲嚴重嘅，一嚟到唔鍾意就走、唔係好同人溝通、堅持己見；亦有啲係一夠鐘就走，結果外賣冇送到，就咁放低咗外賣就返屋企﹔又有送外賣好堅持唔帶找贖，結果人哋要找錢自己要行多轉，再送嘅時候就肯帶埋。」阿Jo指事後有與學生溝通並勸導，對他們有所改進感欣慰：「宜家有時就算夠鐘要走，都會主動話幫我送埋先走。」只要有足夠耐性，慢慢解釋，令佢哋知道有問題嘅時候搵我哋，係有人可以幫佢哋解決困難，自閉人士都可以有好大轉變。

星星堂環境整潔，有賴各人「好手尾」。

臨近中秋，忙於準備月餅訂單。

【社區協作 照亮不同的路】

「最初揀整曲奇，因整完食到、享受到，令佢哋學習更加投入，並嘗試唔同嘅嘢。」阿Jo指成果令人鼓舞﹕「佢哋會知返工要準時、工作須服從﹔仲培養到責任感，分配嘅工作一定要完成等等。」星星堂亦參與了「伙伴倡自強」社區協作計劃，以幫助更多有需要家庭。

疫情影響下，星星堂實習人數及需求有所下降，但不影響阿Jo堅持幫助仍實習的學生﹕「我哋甚至有學員重返校園，入讀香港教育大學賽馬會特教青年學苑，繼續走佢哋鍾意嘅路。」無論學員最終決定如何，他們都給予最大的支持和祝福。阿Jo也希望他們可以獲得不同經驗，成功投入社會。

阿Jo 盼望協助更多自閉人士連接社會。