度身訂做「分子軟餐」 助人為樂硬道理

「軟餐」近年興起，多數人以為是專為銀髮族而設的食品，事實上並非老友記專用：「其實軟餐只係個名，最主要都係要睇番進食者嘅情況。」Kit創立位於大角嘴「簡約吞嚥」，為天然、度身訂做的「分子軟餐」細分四個軟度，希望助人同時改善進食者的進食條件、改變進食者及照顧者舊有「軟餐唔好食」的觀念。

Kit 說：「希望令佢哋重新享受食嘢嘅樂趣。」

「知道好多食嘢有困難嘅人搵唔到啱嘅嘢食，做落發現原來除咗長者、食道退化患者之外，甚至弱能人士同重病患者都有需要」，特別如鼻咽癌患者、口肌無力症人士等，都需要軟餐汲取來自不同食物的營養。

「自己個胃曾有毛病，毫無徵兆下食乜嘔乜，跑去廁所都趕唔切，中、西醫睇過都搵唔到原因」，Kit後來自行上網發現與「胃輕癱」病徵相似。「雖然我唔需要食到軟餐，但因為有咁嘅經歷，令我更明白想食，但又食唔到係咩感受。」

小小的製作廚房一人工作。

四種軟度以四款食品命名

知道坊間軟餐以糊仔為主，味道欠選擇﹕「『糊仔好難食呀』、『好齋唔鍾意食』呢啲聽唔少，所以有午餐肉狀、蘿蔔糕狀、布丁狀同糊狀四個唔同軟度。」以熟悉的食物為軟度命名，令家屬和進食者清楚質感：「因應進食者情況配合合適軟度，訓練逐漸退化嘅食道，延緩惡化同時重新享受食嘢樂趣。」

「宜家多咗唔同公司、企業做軟餐，但數目依然好少。」儘管如此，仍有不少孝子賢孫樂於為上一輩奔走，Kit感動說：「有啲會提議整唔同菜式。有個客嘅媽媽鍾意食冬菜煮鯧魚，咁我就拿拿臨去搵食譜學。」小小的製作廚房一人工作，在夏天也會忙得汗流浹背，「遇到客人唔同嘅要求，好似想濃啲、淡啲我都盡量配合。最挑戰就係煮到新菜式，又令佢哋食得開心」，她說時臉上帶著滿足的笑容。

味道選擇多， 蕃茄煎魚、北菇雲耳蒸雞，甚至燒鴨也有。

進食者自理減照顧者負擔

Kit希望出品的軟餐，將「原來軟餐都可以好好味又多變化」的新思維帶到不同家庭中。「聽過部分安老院舍人手不足，要一個人餵幾個長者，衛生問題同對長者心理健康都唔好。」如果進食者可自己進食，既可以訓練自理能力，又可減輕照顧者負擔。「同家屬接觸多咗，先知佢哋嘅口味會轉得好快，所以叫家屬買定幾個唔同味，當佢哋想食酸，就可即刻整，實行同口味鬥快。」

軟餐可透過蒸、焗的方式加熱。

製作軟餐

1. 首先將需要的菜式煮好，將魚、肉去骨後打爛，加入常見的蕃薯粉、粟米粉等調配出不同軟度，然後倒入小金杯蒸焗。

2-3. 將菜式「打碎」前，Kit會代進食者「相機食先」，令他們知道軟餐中含有什麼

「蠱惑」的food
蘿蔔糕係蕃茄煎魚

大眾對軟餐的「成見」，Kit多番表示難以扭轉：「好多老人家或病患者，覺得食呢啲係唔好食，話食軟餐好慘、好淒涼；啲家屬又覺得：『你唔食呢啲，就冇嘢可以俾到你食㗎喇』」因此，「最主要都係要同佢哋，同屋企人洗腦！」

改變進食者及家人思維

「其實將啲嘢食打爛晒，撈埋一堆俾佢哋食，係好似冇乜顧及到進食者嘅感受，因為佢哋都唔知自己食緊乜，啲味又撈埋一齊，俾你都覺得唔開胃。」所以她希望將「慘」的固有印象改變，將家人的思維改變，再影響進食者抗拒的思想，以嶄新的口味吸引：「原來係食緊蕃茄煎魚嘅蘿蔔糕喎」等等，令進食重新滿載快樂。

因此，無論「分子軟餐」做得如何出色，Kit笑言：「首先都要將佢哋把口撬開！」