全屋廠到全屋闖 拚搏精神袋袋相傳

父親節將至，《我家》今期封面人物講述一個「女承父業」的故事。廠二代劉碧芬（Betty），以一針一線延續父親的工藝精神，並於二零一一年創立本地手袋品牌RBRK。品牌除了結合設計與時尚，更承載着上一代的初心與夢想。對Betty而言，RBRK是一種語言，用每個手袋細說爸爸的堅持與愛。

呢個品牌唔單止代表我，仲代表咗我哋成個家庭。

由雜工做到開山寨廠 第一代有個未圓的夢

「點解人哋可以有品牌，我哋唔可以？」這句話，Betty仍記得很清楚，出自爸爸劉光前師傅之口。劉師傅七十年代來港，由手袋廠雜工做起，再做過百貨銷售員。後來與朋友合夥開設小型工場，一度結業後東山再起，於1987年創立中信公司，專做手袋OEM代工，穩步建立屬於自己的一片天。

當年「山寨廠」盛行，Betty的成長環境正是一間典型的「前舖後居」家庭式工場。「我細個成日喺衣車旁邊玩，有時會幫媽咪排布畀佢車，或者剪線頭。對我嚟講，屋企就係廠，廠就係屋企。」她憶述。機器聲、布疋、紙樣，這些元素交織出她童年的記憶，也潛移默化地成為日後創作的底蘊。

昔日Betty媽媽在「山寨廠」工作的舊照。

//爸爸成日話，睇住咁多客有自己品牌，點解我哋唔得？//

儘管工廠穩定經營多年，劉師傅心中卻始終有一個未圓的夢：想建立一個屬於自己的品牌，不再只為他人生產。「爸爸唔識英文，過去所有訂單都要靠trading公司做中介，其實賺唔多。佢成日話，睇住咁多客有自己品牌，點解我哋唔得？」這份不甘與遺憾，深深種在Betty心中。

父親一直是Betty最強的後盾，不時亦會分享製作手袋的小技巧，默默支持她走自己的路。

赴紐約深造學成歸來 二代面對挑戰領轉型

她在香港完成時裝設計課程後，決定赴美深造，入讀紐約的Fashion Institute of Technology，主修Accessories Design。當她學成歸來，正值家族業務面臨轉型挑戰。OEM訂單流失至東南亞國家，加上市場競爭激烈，家人決定一改過往低調作風，創立自家品牌。2011年，RBRK正式誕生，品牌名稱取自四兄弟姊妹英文名首字母：Rita、Betty、Rock、Kason。

品牌名稱RBRK代表着Betty與四位兄弟姊妹的連結，而她正是當中的主力，一針一線皆傾注心血，織出屬於家人的故事。

//佢冇講『叻女』或者『我以你為傲』，但我知道，佢好自豪。//

雖然父親從不居功，但Betty形容，父親一直是最強的後盾。「例如我設計袋嘅時候，做到拉鏈或扣位唔自然，佢會話：『呢啲要托布，要點樣先有垂墜感』，完全係實戰經驗，無得呃。」爸爸少言，但總能一針見血地指出問題，並教她用工藝解決設計上的困難。

她記得當初推出第一個手袋系列，開設門市，爸爸站在門外望住舖頭，眼中透出無聲的自豪。「佢冇講『叻女』或者『我以你為傲』，但我知道，佢好自豪。」Betty說，這份來自父親的默默支持，是她一直以來堅持下去的原動力。

盼望家族故事獲傳頌

十多年來，RBRK經歷了不少轉折。從商場實體舖到市集擺檔，再重返K11 Art Mall內K11 Select開設零售點，每一步都充滿挑戰。「依家基本上所有嘢都係我一個人做，從設計、營運到同客人溝通。但我覺得值得，因為呢個品牌唔單止代表我，仲代表咗我哋成個家庭。」

「如果你問我今年父親節送咩畀爸爸，我會話，唔係一件禮物，而係一個行動：就係繼續做好RBRK，等更多人知道呢個家族嘅故事，知道我爸爸嘅堅持，仍然喺我身上延續緊。」Betty微笑地說。

//畀人知道我爸爸嘅堅持，仍然喺我身上延續緊。//

由獅子山下拚搏 ，到太平山上散步，一家人一起就是最好的事。

【細微舉動顯爸爸疼愛】

回想童年，Betty笑言自己一直被視為「老竇最錫嗰個」，同爸爸更被笑稱係「餅印」。也正因如此，細個時總覺得有恃無恐，一唔開心就會對爸爸發脾氣，可以唔同佢講嘢幾日。「有次爸爸原本著晒鞋準備出門口，見到我嬲咗佢仲鎖埋房門，竟然脫鞋留喺屋企陪我。」

那刻，Betty突然發現，原來自己可以「控制」到爸爸的行程，於是之後更變本加厲。有時故意鬧情緒，爸爸就會買好吃的回來哄她開心。雖然事隔多年，如今回望，她也笑說：「其實都幾過分，但而家諗番，其實係好細微嘅舉動，都感受到爸爸幾錫我。」

Betty與劉爸爸「餅印」一樣，自小深得父親寵愛。

與爸爸媽咪開心合照，滿滿幸福時光，畀愛畀心。