(西貢)網店女東 療癒心靈關鍵花時間

在大埔家裡，Tessa正在專注地修剪、排列每一朵保鮮花，以便在將軍澳工作坊中做教材示範。這位才20歲的年輕店主，憑着對花藝的熱愛，走出情緒低谷，創立HISOKA.FLOWER，並透過經營保鮮花花店找到屬於自己的方向。

//初時都無諗住做生意，只係覺得整花可以令自己靜落嚟。—Tessa//

Tessa的花藝之路，源自一次偶然的嘗試。她在學時期，一度對未來感到迷惘。「當時我只係想試下新嘢，讀完書就上網搵咗個鮮花課程，初時都無諗住做生意，只係覺得整花可以令自己靜落嚟。」她回憶道，自己曾經有情緒困擾，但當雙手專注於花朵的排列與顏色搭配時，內心逐漸變得平靜。

「一開始都係純粹興趣，第一件作品是製作心愛的Kuromi，後來發現，有人會問『呢啲花幾多錢？』，嗰陣先開始諗，可能真係可以試下賣。」但即使有這個念頭，Tessa仍然猶豫不決，缺乏信心去邁出第一步。

Tessa透過創作保鮮花擺設，尋回內心的平靜感

//學咗花後，佢開頭都唔夠膽響IG開網店。—媽媽//

Tessa的母親一直默默支持她的興趣，見到女兒有意嘗試，便決定給她一個小小的驚喜。「學咗花後，佢開頭都唔夠膽響IG開網店。有次我同佢傾偈，發現佢其實都想試下開，只係唔夠信心，之後我就偷偷地幫佢開咗IG網店，就係嗰一刻，我哋嘅小花店就開始咗。」Tessa的媽媽笑說。

帶著手工作品到市集擺賣。

//原來自己配搭嘅顏色係好嘅，有人會買㗎喎。—Tessa//

有了媽媽的支持，Tessa開始嘗試將自己的作品放上網，慢慢地，訂單開始來了。「原來自己整嘅花係靚嘅，有人鍾意喎。原來自己配搭嘅顏色係好嘅，有人會買㗎喎。」這份肯定，讓Tessa的信心大增，她的花店也逐步發展起來。

「本來只係我自己一個整，後來媽咪見我一個人好辛苦，就決定一齊學。」現在，HISOKA.FLOWER成為一間由母女二人共同經營的小店，Tessa負責設計和製作，而媽媽則幫忙處理店舖管理、補貨等工作。

//年輕人應搵自己嘅興趣，之後先決定向邊個方向發展。—媽媽//

Tessa坦言，創業並不容易，材料成本高，製作時間長，但媽媽一直陪伴著她，提供資金與支持。「媽咪幫咗我好多，好多謝佢。」母親的支持不僅限於經營花店，她更鼓勵Tessa多方面嘗試不同的興趣。「其實好多年輕人畢業後，都會對岀嚟社會工作好迷惘。當時我都只係建議Tessa岀去咩都學下先，搵自己嘅興趣，之後先決定向邊個方向發展。」

教授自家製作保鮮花擺設，成為獨一無二的禮物

【望開實體店推廣花藝】

如今，Tessa的作品已經不只是在IG銷售，更有機會進駐原創品牌實體店Louder門市，甚至在將軍澳分店舉辦花藝工作坊，分享這份療癒的力量給更多人。回顧過去三年，Tessa笑言自己成長了不少，除了掌握花藝技巧，還學會了如何與客人溝通、如何經營一盤生意。「其實呢個小店已經踏入第三年，我都無諗過可以堅持到依家。」

談到未來，她希望可以開一間實體店，讓更多人可以親身體驗保鮮花的美。「我都想繼續學多啲新技術，將作品做得更有特色，令更多人感受到花藝嘅魅力。」

因花藝這愛好，結識不少新朋友。