(西貢)義賣小檔主 行善之中學習

暑假微雨的周末，西貢街頭變得熱鬧。十幾位小朋友檔口前舉牌吆喝，向街坊和巴士乘客揮手：「Charity Sale! Come to have a look!」這是由孩子親手籌辦的慈善義賣：自己設計海報、落區派傳單、安排檔口，一手一腳完成。背後默默推動的，是Lighthouse Playroom主理人Jasmin。

Jasmin與三名子女

//全部都係小朋友自己做，唔係大人代勞。//

「重點唔係賣到幾多錢，而係佢哋真係做過一件事。」Jasmin笑說。為了讓活動真正由小朋友主導，她特意在義賣前安排「小檔主訓練」環節：讓孩子們討論今次想支持的慈善機構、規劃物資收集與攤位擺設、學用簡單設計工具製作宣傳單張等等，「全部都係小朋友自己做，唔係大人代勞。」她強調。

Jasmin曾任護士，也是三個孩子的媽媽。十多年前，她與任教幼稚園、小學的先生搬進西貢。「大仔出世冇幾耐要搵playgroup（遊戲小組），但區內選擇唔多。與其舟車勞頓，不如自己做。」原是一項「自肥計劃」，因着社區需求，慢慢變成陪伴西貢街坊的育兒基地：有幼兒遊戲小組、學前適應班、語言及興趣課程，也有親子活動和家長講座。

//其實在玩裡面學到好多嘢；先喜歡學，先走得遠。//

「Lighthouse就好似學海中嘅一盞小燈塔，畀孩子一個方向，帶住佢哋行。」她堅持在輕鬆互動中學習，少一分填鴨，多一分探索。「小朋友覺得係玩，但其實在玩裡面學到好多嘢；先喜歡學，先走得遠。」

義賣當日天色不穩，雨點零星落下，人流未如預期。幾位小檔主即場用紙皮畫起大字牌，站在門口向巴士上的乘客揮手，又結伴邀請街坊前來。「嗰刻見到佢哋勇敢地開口、自信地介紹貨品與受惠機構，我好感動。」Jasmin回憶。

//等孩子知道世界上唔係人人都咁幸福。//

三個孩子當然也有份落手落腳。兩個已是青少年，參與策劃同執行；細女則當日自己開了個小檔口賣心愛物品。除咗她的孩子，還有其他學生一齊加入。「佢哋好開心，覺得可以賣到自己嘅嘢，換到錢嚟幫人，之後都問：『下次幾時再做呀？』」她笑着說。孩子從怕醜到主動，從只顧自己到懂得幫手。「佢哋未必講得出學到咩，但睇得出成長咗，知道世界上唔係人人都咁幸福。」

義賣現場，除了影相時刻，孩子們都舉牌大聲叫賣，勇敢向街坊介紹。

【親子經驗談】

公共事務助力孩童成長

在Jasmin眼中，西貢的社區特色，正正賦予這場義賣的溫度。「喺街上總會遇到熟口熟面，大家互相打招呼。」原居民、外來家庭、外籍人士在此匯聚，孩子自小便與多元文化同行。「呢度好似細社區，但乜都有；孩子學識尊重與接納，也更願意走出去。」

談到未來，Jasmin希望義賣不止於西貢，「如果可以延伸到將軍澳，甚至其他地區，就可以俾更多小朋友早啲有機會參與公共事務。」她相信，比起中學、大學才接觸籌辦活動，小朋友更早體驗籌劃與合作，對學習與成長都有幫助。

家長與孩子一同成長，感受「燈塔」般的指引與溫度。