(沙田)義教街坊20年 太極師父球場太極緣

平日八點多，當都市人急急步咬住早餐趕搭車，一班馬鞍山街坊在屋邨籃球場，悠哉悠哉揮手踏步做慢動作，掀起不一樣的節奏，是一道美麗的風景線。

八段錦、孫氏太極、二十四式、耍刀揮劍……20多年前，太極教練麥師父獲區內醫生邀請，到錦豐苑籃球場幫忙義教太極班，這班有緣人的友情歲月因而展開。

70多歲的麥師父，多年來感染多位學生精研太極，近年更將日常的帶領工作交托學生敏姐，他卻仍堅持每週二從黃大仙的住所遠赴馬鞍山，為與一眾老友記相聚。

# 麥師父：「見到佢哋健康，我就繼續做！」

＃學員：「未夠喉，運動要日日做！」

他回憶起：「初時，只是教班婆婆八段錦當早操，因為醫生說能增強免疫力，慢慢越來越多人經過，然後加入，最高峰試過有50人一齊耍。」

麥師父未有將義教班停下來，其中一個很大原因是，他見證多位長者藉運動強健體魄，「80多歲婆婆，每日堅持我教嘅動作，醫生都唔駛睇，眼見效果幫到人，所以一直做落去！」太極班於是從一星期兩日，到現時禮拜一至五開班，學員們異口同聲說：「未夠喉，運動要日日做！」

由陌路人到組成「馬鞍山孫氏太極同學會」，每日相見何止那太極一小時！20多位學員已成「朋友圈」，多年來相約到處放電，「我哋會一齊去飲茶、唱K同去旅行，周圍搵好嘢食！甚至熟絡到連大家嘅仔女同孫仔孫女都認得！」敏姐興奮道出太極友之交情。

＃學員：「我哋唔係長者，我哋乜都玩，心境仲細過五歲小朋友呀！」

球場除了是太極學堂，還是街坊分享站！正所謂老友記「有福同享」，他們笑說幾乎隔日就有一大堆「手信」帶回家加料，皆因學員們愛分享食物好品。訪問當日，麥師父則帶來重磅燒味，學員周太也剛好拉著手推車，向一眾老友遞上一人一大嚿「靚蕃薯」！

麥師父特別提及周太，正是他首批學員，她能以75歲高齡堅持訓練，甚至勇於挑戰高難度動作，疫情下在家仍未有一日停止耍八段錦，是眾學員的榜樣。

屋邨籃球場上的一道風景線。

【健康話你知 煩惱話之你】

＃湊孫有心有力

Eve：「以前我好多隱疾，特別係坐骨神經同頸部疼痛，自從加入太極班之後，慢慢感覺到身體變好，孫仔出世之後都可以自己一手一腳湊佢！我成日同醫生講，到呢個年紀出來玩多D，其實減輕政府負擔㗎！」

他們盼鼓勵身邊更多老友記運動強身。

＃領略身心放鬆

Mary：「耍太極之後，我心態上好大改變，以前工作壓力大，經常很繃緊，初初覺得係年紀大專屬運動，其實唔係，太極令我學懂放慢同有恆心，眼見好多70歲、80歲都堅持做，作為自己一個榜樣要活到老學到老！」