兒歌天后隱身幕前 仍堅持貢獻幼兒教肓

資訊科技發展一日千里，街上隨處可見小朋友配有智能手機；加上社會競爭激烈，小朋友課後又有各種興趣班、補習班，隨時比大朋友更忙，怎可能留家看電視兒童節目？那種自由自在的時刻，真的歲月無聲消逝？從前活躍於大氣電波的兒歌天后李紫昕（Purple姐姐），即使隱身幕前，仍堅持貢獻幼兒教育，以創作喚起純真力量。

Purple 姐姐觸碰「三角」的關係，就是兒歌天后、幼兒教育、音樂創作，交織出純真正能量。

Purple姐姐退居幕後，依然從事幼兒、教育發展，經常與各區不同幼稚園、小學，以至中學合作，開展不同課外活動班。雖然受疫情影響，Purple姐姐許多興趣班由面授變成網上授課，雖然隔著屏幕，小朋友興致不減。「真係好神奇，佢哋同疫情之前冇咩分別，依然好活潑精靈、投入上堂。」

與不同學校合作，舉辦多種課程。

盼港人擁赤子之心
處難關仍樂天正面

「最近就有個活動教小朋友做健康操，成個活動喺應有嘅社交距離下進行，我同幾位小朋友係一個大約中間位置度做運動，然後就Zoom晒去其他班房。」

她直言這些小規模的「直播」體驗也帶來了新鮮感，令她感受最深的是小朋友的反應。「一如以往咁熱情同積極，唔會因為疫情隔咗個鏡頭而影響佢哋上堂、參加活動嗰時嘅投入程度。」希望香港人也可以像小朋友一樣，雖然面對一些難關，但仍然可以保持樂天、正面的心態。

口才班、面試班、音樂劇班、編劇班等，深受小朋友喜愛。

疫情無減作品產量
卡通類教學類都有

Purple姐姐的工作量因為疫情不減反增，除一般卡通嘅主題曲、插曲外，也有不同含教學意義的歌。「呢段時間我寫嘅歌仲多咗，譬如節日嘅歌、教科書上嘅歌、生活上一啲知識嘅歌、防疫嘅歌都有，甚至有大朋友問番學校有冇教科書上面我寫嘅歌嘅Demo。大大話話都唔知幾多百首，最後都成功錄埋俾佢哋，方便學校同大朋友更易達到教學目的。」

她亦提及，曾寫過一首筆順歌，以一個明快的旋律，「幫小朋友輕鬆將知識記住，又可提高對該事物的興趣，何樂而不為？」

走入校園，又多了一批fans。

「小朋友都需要屬於佢哋自己嘅快樂」

「時代其實一直都轉變，無論大、小朋友都喺唔同嘅媒體上面，睇好多唔同嘅嘢，宜家疫情期間更加喇。」她認為實體和網上的娛樂，不一定是互相取代的關係，而是互補共存。「始終，小朋友都需要屬於佢哋自己嘅娛樂，會唔會係兒歌﹖兒童節目？其實正常情況下，一啲面對面嘅現場表演或者遊戲，當中嘅互動，對佢哋嚟講都係重要。」

不忘創作初心不作利益計較

Purple姐姐堅信只要不忘創作的初心，摒棄利益上的計較，全力做好自己的音樂，無論過了多久，就一定會有人看到。

「好多好多嘢可以做。」

「我又唔覺得係好悲觀嘅感覺，兒歌嘅題材包羅萬有：親情、友情、成長時遇到嘅挫折、忐忑等等都可以寫，令小朋友嘅情感可以得到抒發，甚至引起對其他事物、藝術嘅興趣，好多好多嘢可以做。」同時勉勵本土創作人，「我哋唔好自己打擊自己：『哎呀佢哋都唔睇喇，咁我都唔做喇﹗』、『隻歌都唔知受唔受歡迎』，當你越有咁嘅觀念咪會越冇動力去做，但你唔做嘅時候，呢樣嘢就更加可能
會慢慢消失。」

全力做好音樂，在台上覓理想。

「兒歌」定義或變內容始終如一

舊時，「嗱，每日放學就好快啲番屋企，做好功課先有得睇電視啲卡通片呀！」；現時，「好喇，我哋快啲去上小提琴，之後食完個飯仲要去學游水！」。事實上，兩個場面發生的年代相距不遠。世界真的走得太快了！

雖然如此，親子的時間無論係咩時代，個大環境點轉變都好，最重要的還是一點：大家都係有個童年。Purple姐姐說：「現在小朋友如何去認識父母的童年、他們的回憶是什麼呢？而我哋本地製作的回憶，究竟係我哋冇去探討、定我哋根本冇畀時間小朋友去參與呢？」

「所以邊個話小朋友唔再需要屬於佢哋嘅音樂，屬於佢哋嘅兒歌？」Purple姐姐認為，「兒歌」的定義可能有變，但內容卻永遠不變。「小朋友就好似海綿咁，佢哋成日吸收好多唔同嘅訊息。咁所以其實係咪卡通歌就先叫做兒歌呢﹖呢啲歌就唔叫兒歌呢？」

盼喚醒大家的集體回憶，讓大人小孩感受對方的童年時光。

下月底公演全新原創音樂劇，名為《台長奇遇記》。

【  音樂教育 重點抒發情緒 】

至於音樂教育，這位兒歌天后不是要小朋友用以傍身作「敲門磚」，而是視之為情感的教育。她表示，大朋友需要音樂嚟陶冶性情，「其實有啲歌聽落只係抒發情緒，都已經可以幫到聆聽者。咁所以你話，點解小朋友就唔需要呢？」小朋友的音樂教育非常重要，透過音樂，無論是正面、有教學意義的歌詞：還是抒情、悲傷的旋律，大家都需要給予時間，以培養他們對音樂的興趣。

Purple 姐姐認為音樂教育非常重要。