單親爸愛唱哥 音樂不限知音快樂

人生必有苦，痛失摯愛的苦為其一。有人一直消沉下去，亦有人因為「愛和責任」試從傷痛走出來，「做Channel」的創辦人Kenji就是這種努力活下去的例子。在思念亡妻同時，著手一個人圓「兩個人」的夢，以單親爸爸的身份父兼母職，陪伴四孩成長及守護凝聚音樂人平台，並將正向訊息融入音階與歌詞，望喚起同路人以至社會大眾的共鳴。

 //「街頭表演嗰陣你同聽眾身處同一個空間、感受同一陣風、分享同一種氣氛。」//

忘我高歌的背後，Kenji付出了很多努力。

Kenji與太太Maggie生前一同創立成立「做Channel」，希望透過平台凝聚音樂人追夢，但就在同一年年底，太太離世對Kenji造成極大打擊。隨時間流逝，他稍為冷靜下來後，認為有責任延續與愛妻的共同心願，於是努力想辦法守護平台。

引起共鳴，是社區表演最大動力。

人生不如意事十常八九 

//「冇酒吧表演呢段期間，合作嘅樂隊有好多人都轉行。」//

「因為冇正式學過唱歌技巧，開頭淨係識就咁唱，拍子又唔啱，之後喺朋友身上取經一段時間之後進步咗好多，有人提議我哋一班玩音樂嘅人出去做show。」得朋友同行，「膽粗粗」嘗試到酒吧表演，卻得到意料之外的正面迴響，由太子一間小酒吧唱到蘭桂坊。

可惜好景不常，酒吧業在社會運動及疫情下首當其衝﹕「冇酒吧表演呢段期間，合作嘅樂隊有好多人都轉行，送外賣、揸車都有。」為勢所逼，失去表演場地，Kenji和朋友Heyman一人彈琴，一人唱歌，由荃灣站外人流較密集的地方開始﹕「要令路人停低聽晒成首歌，再奉獻金錢，其實唔係一件普普通通、唱得好就得嘅事。」

「最大嘅阻力係有人投訴滋擾、報警、去唔同地方泊車嘅時候收『牛肉乾』、表演嘅時候遇過被人聲嘶力竭咁鬧。」Kenji除了街頭表演，還會每月兩次網上直播，但他指兩者皆為表演者及聽眾帶來不同的感覺﹕「街頭表演嗰陣你同聽眾身處同一個空間、感受同一陣風、分享同一種氣氛，好似互相連結起嚟。」

經歷喪妻之痛，音樂是重新出發的channel。

心靈料理主要材料就是「音樂」。

街市唱英文歌被指缺共鳴

// 「表演者要自我享受，都要考慮到聽眾係咪同樣樂在其中。」//

共鳴，是他透過街頭表演，了解到在藝術表演中的重要元素﹕「我哋試過喺荃灣楊屋道街市唱英文歌，但因為嗰度出入嘅都係家庭主婦、街坊街里，於是有位叔叔行埋嚟同我哋講『喂靚仔，你唱呢啲歌我哋冇共鳴呀，轉吓張國榮吖得唔得呀？』」

因著這個要求，Kenji由〈海闊天空〉唱起，便開始吸引一班聽眾圍觀。「表演除咗我哋表演者要自我享受，都要考慮到聽眾係咪同樣樂在其中。」

Kenji希望他的音樂不但能助人疏導情緒，為其他正面對逆境的過路人以打氣、重建正面、積極的心態﹔亦希望將部分社會問題融入短劇，以情動人，吸引大眾嘅注意。

起初冇正式學唱歌，後來獲朋友指點而升呢。

身兼母職照顧四孩，望以音樂陪伴孩子成長。

街頭音樂表演 注入戲劇元素

今年是香港一代巨星「哥哥」張國榮離開20週年，Kenji亦提及自己是「哥哥迷」，歌詞間許多「相遇」的故事，而自己亦想著以音樂說故事的目標進發。

在電台節目分享親身經歷。

期望香港人樂觀面對挫折。

處境劇涵人生體會

//「通過音樂抒發情緒，係令我重新出發嘅助力。」//

當時，他在街頭音樂表演加入戲劇元素﹕「平時都係一首首歌輪住唱，但係我哋加入自編嘅話劇元素，配合音樂梅花間竹表演，編排一段段大約10分鐘嘅音樂小話劇。」短短的音樂處境劇，包含Kenji部份對人生的體會﹕「因為太太過咗身，我有段時間情緒極度低落、消沉，但我仲有四個小朋友，通過音樂抒發情緒係令我重新出發嘅助力。」

街頭表演，小朋友淡定不怯場。

父子準備Jam吓歌。

【教我堅毅望著前路叮囑跌倒不應放棄】

網上自學結他 子女獻「真的愛你」

Kenji的孩子們耳濡目染下常加入表演，踏上奇妙音樂之旅。Kenji為生計奔波，欣慰四孩懂事同時亦感愧疚又自豪﹕「我冇咩錢畀佢哋去學唔同嘅嘢，我識嘅嘢都會盡量教﹔但有日突然話要自彈自唱首〈真的愛你〉畀我聽，原來佢地自己網上自學結他，學好之後畀驚喜我。」

他慶幸孩子們並沒有因為失去至親而變得「孤僻」，而依然保持正面、唔驚鏡頭、唔驚人﹕「曾經阿囡要出去表演，我都有擔心過佢應唔應付到，但見要表演嘅時候都好淡定，唔怯場，真係好欣慰。」

生活點滴親情互動

子女年幼就失去母親，Kenji向自己承諾盡力父兼母職，將好生活帶給他們﹕「佢哋好生性，知道媽媽唔會再番嚟，囡囡曾經成日望住我，睇吓我有冇眼濕濕，甚至試過調番轉安慰我。」生活上的點滴，為Kenji帶來的是珍貴的親情互動。

 //「囡囡曾經成日望住我，睇吓我有冇眼濕濕。」//

孩子為父親影「開心相」。