(荃灣葵青離島)紙號兩代人 感受非「現實」社會

位於石籬大白田街馬路邊的一間紙紮店，由林氏一家經營。由第二代人接手至今近二十年，屈指一算，該店紮根石籬已逾半個世紀。店裏裝修簡樸，處處可以發現到歲月的痕跡，古舊的用具承載店東一家以至街坊的不少回憶，在這個日新月異的社會，已經不再常見。

林太：「呢一行，需要一群對傳統好忠心嘅人撐落去。」

林太今年七十多歲，開店至今每天風雨不改到店裡幫忙。以前的人讀書不多，可選擇的工作也不多，當時家家戶戶都拜神，林氏為養活一家六口開辦紙紮店。「以前生活唔容易，啲細路放學就返舖頭做功課、食飯，收舖就抹地，鋪紙皮喺地下瞓覺，一點一滴回憶都喺舖頭裏面。」

在石蘺區營業多年，見證社區人事變遷。

做呢行好似做中醫咁，有啲人就算冇病都會睇醫生，似求個心安咁。

但時代不同了，昔日小店都被大型連鎖店取替，人情味彷彿是奢侈東西。「石籬依然好有人情味，大部分客人係老街坊，幫襯咗好多年，好似琴日有個婆婆嚟買嘢，無啦啦俾咗封利是我。好多街坊買西餅蛋撻都專登買多半打，生咗BB又會派啲紅雞蛋過嚟。」二哥說。「以前節日氣氛濃厚啲，中秋節啲街坊會買嘢拜嫦娥，端午節啲人會拜龍舟，以前舖頭除咗買紙紮仲會整餅，所以大時大節氣氛好好，特別感受到社區裏面嘅溫暖。」

問及工作辛苦與否，林太笑說：「梗係辛苦啦，要早起身一腳踢做所有嘢，由摺金銀、入衣包、執貨擺貨都自己做。」為何要堅持？她這樣回答說：「我覺得呢一行業幫到人，我覺得呢行好似做中醫咁，飲涼茶未必真係醫到你，人地嚟到有咩唔舒服或者有咩運滯，咁我咪好似涼茶店咁執劑茶畀你，執啲金銀衣紙畀佢哋，拜咗個心安理得，起碼個心都舒服啲，可以話係一個心靈上嘅慰籍。」

林太形容紙紮舖猶如中藥行。

有啲熟客成日帶埋仔女嚟幫襯，到佢地過咗身，仔女就嚟買野拜返父母。

紙紮店主要做老一輩的人生意，在這半個世紀也不免經歷過街坊朋友的離去，林太道：「呢個確實係做呢行心酸嘅地方，有啲熟客以前成日帶埋仔女嚟幫襯，到佢地過咗身，仔女就嚟買野拜返佢地父母。好記得有個老人家帶個仔嚟買嘢，佢個仔就喺後面講都收唔到㗎啦唔使買咁多，而嗰位老人家細細聲同我地講，買嘢拜神拜祖先，我哋而家做足啲做多啲，希望下一代睇到都會跟到我哋，唔好斷咗個傳統。」

年逾70 歲的「事頭婆」林太，凡事親力親為。

傳統文化係寶 偏偏抵觸環保?

「其實亦都好多年輕人係跟得到，好孝順咁承傳落去，有時因為佢哋嘅消費能力高啲，會買更加多嘢，亦都因為資訊發達，更加多人了解拜神嘅傳統，有更加多年輕一輩繼續傳承拜神呢種傳統。」二哥說道。

因為燒街衣造成的空氣污染，引起好多環保人士的反對，亦引起很多居民投訴濃煙會影響健康，有研究顯示，平均燒一公斤的紙錢會產生1.5公斤的二氧化碳，亦會產生其他有害化學物質，影響人體呼吸系統。

二哥有感而發：「有啲人好抗拒道教要燒衣燒香，我希望包容啲，尊重其他人嘅信仰，雖然燒香燒衣可能會造成煙灰，有人會好嫌棄，其實過程只係好短暫。」不同信仰都有不同儀式，應給予尊重和接納，傳承傳統文化，建造共融的社會。

源豐紙號，現由二哥打理。

二哥表示，希望大家懂得尊重其他人的信仰。