(屯門元朗)紅Tee陪月員 陣陣笑聲藏親子秘笈

在天水圍街市，街坊早就認得Angie的身影。紅色T-Shirt配上一個粉紅色環保袋，成為她的「標記」。大家見到她大包小包拎住新鮮餸菜，都會笑住打趣說：「又有BB出世喇？」Angie總是報以爽朗笑聲，提起步伐繼續趕往另一個家庭。

細心觀察BB嘅需要，有耐性去回應，BB 得到滿足就會容易哄。— Angie

//我對自己要求好高，但嗰份工（零售管理層）真係消耗晒我嘅身心。」//

Angie原本在零售行業工作，做過珠寶sales，也曾升上管理層。她形容那段日子「壓力爆煲」，甚至因為免疫力失衡，出現嚴重甩頭髮同濕疹。「我係一個對自己要求好高嘅人，但嗰份工真係消耗晒我嘅身心。」她決定轉行，經過思量，最後選擇了「陪月」這一行。轉眼已經10年，她累積照顧過接近90個新生嬰兒。

一開始，她只是因為侄仔出生，認識到有陪月姨姨這個職業。她笑說：「嗰陣時未流行，請陪月都係萬一二蚊，大家都覺得唔一定要請。但我見到呢個行業幾有意思，加上我本身唔抗拒BB，又鍾意煮嘢食，就去讀書考牌啦。」

細心觀察 BB 嘅需要，耐性回應。

//要畀自己更專業，先可以令媽咪信得過。//

由美容課程轉到嬰兒按摩、產後飲食、中醫基礎，Angie幾乎一星期返四五晚課，不斷進修。「頭五年真係好瘋狂，但好充實。因為要畀自己更專業，先可以令媽咪信得過。」她說。

對於手忙腳亂的新手爸媽，Angie總有一套「陪月秘笈」：「唔好驚，唔好成日諗自己做得好唔好。細心觀察BB嘅需要，有耐性去回應，BB得到滿足就會容易哄。最緊要係享受親子互動，因為BB一日一日長大，每日都會有新嘢發生，好快你就會珍惜呢段時光。」她特別鼓勵新手爸爸多落手落腳。「好多爸爸驚自己太大力會整親BB，其實只要多啲鼓勵同指導，好快就可以熟習。」

Angie 說：「煮飯外，陪月要教如何建立親子關係。」

//（憶述一對小兄妹）嗰一刻真係覺得同呢個家庭特別有緣分。//

十年來，她陪伴過不少家庭，但有段經歷仍令她每當回想時就會心一笑。那是一對相隔兩年的兄妹，照顧哥哥同妹妹期間，兩次都剛好「撞正」Angie的生日。「真係好神奇，媽咪仲特登買咗蛋糕，仲叫哥哥唱生日歌俾我聽。嗰一刻真係覺得同呢個家庭特別有緣分。」

十年下來，她見證無數家庭的喜悅與眼淚。

【小錦囊】

新手爸媽須知

踏入10月，離天氣轉冷之時又近一步，Angie不忘提醒新手爸媽注意細節

1. 冬天開暖氣，室內要放杯水保持濕度；

2. BB瞓覺時可戴帽，因為頭部散熱快；

3. 蓋被唔好蓋手，避免BB把被拉上臉；

4. 測試體溫要摸後頸或鎖骨，不要靠手腳作準。

充滿愛心的Angie，還領養了兩隻小貓咪。