聞西──冬蔭炒海鮮 先浸鹽水蜆心思

立春之後，天氣經常陰陰濕濕烏雲密佈，成個人周身唔自在，好想食啲辣嘢去濕，就煲個冬蔭公湯啦！自己煲我唔會落椰汁，費事咁油膩，有時候會走酸走辣，落大量蕃茄會變咗一個好好味道嘅火鍋湯底，配海鮮真係一流，我都介紹過好多次。街市泰國雜貨店有執好一包包嘅新鮮冬蔭公湯料非常方便，只要屋企有樽泰式辣醬及魚露，當然仲要有蒜頭及乾蔥頭，咁就隨時都可以有冬蔭功飲喇。

話說我買晒所有材料返到屋企，突然改變主意決定炒海鮮，做廚就係咁，啲諗法就好似春天嘅天氣咁五時陽光六時落雨，今次怕大家悶就唔用泰式辣醬喇。記得之前有朋友用綠色嗰種泰式海鮮醬炒蜆意外地好食，個醬酸酸辣辣本身配白灼海鮮已經好夾，估唔到用嚟炒餸會有種蠔油嘅鮮味。

蜆買返嚟要用鹽水浸一陣，佢好得意咁會吐好多氣泡出嚟，如果有泥嘅話就會順便吐埋出嚟，咁就保證唔會食到成口沙啦，同樣用嚟炒其他海鮮相信都一樣好好味。記得全程用中火至中大火，務求用最短時間將啲海鮮炒熟，容易熟嘅例如魷魚就可以遲啲落鑊。另外，炒香料嘅時候要落多啲油，否則就唔香㗎喇。至於調味料包入面有嘅青檸，今次用唔著，我會切片加落啤酒，食辣嘢飲啤酒，人生一樂也！

材料：

調味料：

做法：
1. 切好所有香料，泰國芫茜分開放，洗乾淨啲花甲，將魷魚筒切件，中蝦喺蝦背𠝹一刀方便入味及除蝦腸，草菇我鍾意切半。

2. 熱鑊落油先爆香冬蔭功香料。

3. 加入花甲及蝦，炒至半熟落埋魷魚及蘑菇。

4. 落調味料續炒，見材料全熟就可以打個薄茨，最後加入泰國芫茜炒勻就可以上碟。