聞西──西米肉丸 凍熱皆宜泰方便

啱啱過咗嘅4月13號係泰國潑水節（Songkran），亦係泰國人嘅新年，講節氣就係春分，代表新一年嘅開端。潑水節最出名當然係節日期間大家互相潑水慶祝，淋水喺佛教傳統儀式代表淨化、祝福，藉住互相潑水象徵清除厄運、罪惡，開始純潔嘅一年，係一個祈求佛祖保佑，充滿祝福意義嘅節日。至於你肥或瘦，就唔關人嘅事啦！

我呢，一次潑水節都冇參加過，因為嫌機票貴、酒店貴、人又多、去按摩又要預早book定，而且食飯又要等位諸如此類，真係好麻煩。不過，疫情之後我嘅諗法又改變咗，有得再飛一定會去，因為你真係唔會知道以後有冇機會再去！朋友話我好「變泰」，我笑足半日，因為我又整泰國嘢食，今次整泰國路邊攤嘅一款小食：西米肉丸。呢個係一款可以凍食嘅點心，天氣熱嘅時候食就啱晒（熱食都可以），煙韌嘅西米皮包住又鹹又甜嘅餡料真係好好味，加埋酸辣嘅泰式海鮮醬就冇得頂！整嘅過程係有少少複雜，同埋都要有啲煮嘢嘅經驗先得，我提議一家人或者一班朋友一齊整，有得玩又有得食！

材料：
免治豬肉150g、乾蔥頭150g、泰國蘿蔔乾50g（可以用菜脯代替，不過要浸水減鹹），花生50g、椰糖150g、蒜頭4粒、芫荽1棵

另外可以準備適量白菜、生菜及芫荽伴食，沾醬就用泰國海鮮醬

調味：
魚露11/2湯匙、甜豉油1湯匙

做法：

1. 乾蔥頭、菜脯切到好碎，有攪拌器就可慳水慳力啦。蒜頭及芫荽（連根）加1/2茶匙胡椒粉，然後攪或剁成蓉備用，花生則可放入密實袋用重物壓碎。

2. 開始煮餡料，凍鑊落油，落一半蒜蓉芫荽醬及乾蔥蓉，開中火炒香之後加免治豬肉及菜脯。下一步，落調味料及椰糖，留意加入椰糖後材料開始變黏稠，等到炒至杰身就可加花生碎拌勻。由於餡料最後要搓成球狀，所以唔可以有太多水份，完成之後裝起攤凍備用。

3. 將餡料搓成波子大小，西米逐少加入熱水攪拌，直至有啲似麵粉團咁即可。千祈唔好太濕，否則好難包住個餡，最好手濕水，將大約一湯匙西米放喺手心略略壓平，將餡料放喺西米皮中間，再慢慢完全包住個餡。太黏就加少少水，搓成圓球放喺掃咗油嘅碟上面。

4. 用中火蒸西米肉丸10分鐘左右，或者西米皮變咗透明都得。就算西米未熟晒（有白心）都冇問題㗎，當然你蒸耐啲都得。傳統做法，西米肉丸蒸好要掃蒜油，不過我懶就用橄欖油代替啦。餘下的一半蒜蓉芫荽醬炒熟白菜上碟，上面鋪塊生菜，放上西米肉丸，等最後淋啲泰國海鮮醬就搞掂。當然加啲炸蒜或肉鬆就更加好！