聞西──雜菜蛋餅 去到邊都好食

曾經病毒好似離我哋好遠，除咗無得去旅行，要戴口罩同注意個人衛生外，生活總算正常。不過，隨住第五波疫情蔓延，大家開始感受到影響，宜家每個禮拜都有同事須強制性檢測，好多部門都有人中招。上星期終於輪到我office有同事屋企人中咗，全部同事要去檢測，原來真係殺到埋身先識驚㗎！

其實整個社會都受影響，不久之前菜價大幅飆升，四十蚊斤菜心不是夢，超市啲菜俾人搶晒，原來我哋嘅香港都可以變成咁（嘆氣）。我當然無同人搶菜，唔食幾日菜係唔會死嘅，況且我家雪櫃長期有急凍蔬菜存貨，例如青豆、西蘭花，想幾時食都得。事實上，急凍蔬菜嘅營養價值同新鮮比唔會差好遠，有營養師表示，用急凍方式處理蔬菜能夠將營養素及抗氧化物鎖住，所以菜貴嘅時候，急凍蔬菜絕對係好選擇。

因為大部份急凍蔬菜已煮熟，所以唔適合煮太耐。我會用最簡單嘅方法去處理，就係做蛋餅，方法係以前阿嫲教我嘅，蛋餅個邊煎到脆脆真係好好食！宜家仲可以加埋芝士添，連煎pan一齊上枱夠晒熱辣辣。蛋餅放咩材料都得，最緊要係冚蓋慢慢焗，蛋餅成型之後要喺蛋餅邊加油先會香脆，就好似大家面對疫情一樣，都要加油齊心抗疫呀！

材料：

急凍西蘭花300g
樽裝吞拿魚肉60g
雞蛋5隻
蒜頭3粒
Mozzarella芝士碎適量
鹽1/2茶匙
胡椒粉1/4茶匙

做法：
1. 先處理好各樣材料，將急凍西蘭花解凍，樽裝吞拿魚用叉略略壓散、剁碎蒜頭、打蛋加鹽及胡椒粉並拌勻。

2. 煎pan開中細火，落油爆香蒜蓉，然後放吞拿魚略炒，之後落埋西蘭花同炒。

3. 材料炒到見軟化，落蛋漿，盡量令材料均勻鋪喺煎pan，再隨心所欲落芝士碎。

4. 冚蓋轉細火煎焗到蛋餅成型，之後喺餅邊加油，再煎焗到個邊香脆就得。家有火槍可燒燒蛋餅個面，賣相就會更好囉。最後，可撒少少辣椒粉或黑胡椒碎調味。